Da parma repubblica .it. Tv Parma, Gavasól al n’é pu al diretór. "La motivasjón la crìzi e la cuestjón econòmica"

(Traduzione in dialetto parmigiano di Enrico Maletti)

Dòpa 9 an' al diretór ädla stòrica trazmiténta locäla l’é stè ciochè a ca’ da l’ aziénda par cuestjón äd sold.” Gh’è la crìzi e a gh’éra da mètt’r insèmma la redasjón dal giornäl e còlla ädla tv. Acsì j àn deciz äd tajärom. Ringràsi tutt"

äd JACOM TALGNÀN (da parma.repubblica.it)

Andrea Gavasól al n’é pu al diretor äd Tv Parma. Un divorsi ala bäza äd cuestjón äd sòld: "Al m’è stè cominichè da l’ aministrasjón ch’ a ‘n sarò pu al diretór -a dìz Gavasól ciamè telefonicamént -. ‘Na selta ch’ l’é städa fata par cuestjón äd sold. Mi costäva trop e l'aziénda l’à gh’äva bizòggna äd mèttor insèmma la redasjón televizìva con còlla dal giornäl . Acsì i m’àn tajè. Fòrsi l’é ‘na cuestjón äd perìod, fòrsi j äva fat al mè témp". Al sò témp j én 13 ani. In-t-al 1998 al giòvvon giornalìssta l’é stè - asunt da Salvatore Marando - cme redator äd Tv Parma indò al s’ ocupäva dal Tg ädla matén’na. Pò, dòpa ani äd gavètta, l’é stè numinè diretór. In-t-al 2003 Gavasól al tóz al post äd Gabriél Balestràs ala gvida äd Tv Parma. Incó "lasè a ca’": "Cme n’ alenator, fòrsi a volti l’é necesäri cambjär. Giuljàn Molòss al torà al mé post controland tv e cärta. Cèrto, un pò d’ amarèssa l’à ghé: dal pónt äd vìssta giornalìsstich a crèd d’ avér fat bén, j ascolt j andävon ala granda a s’érom e a sèmma, la televizjón locäl (insèmma a Telereggio) con l’ascolt pu bón ädla regjón”.

Anca se i dät j én bón bombén però, a cavsa dal marchè publicitäri in crìzi, la sò poltrón’na l’é saltäda.
"Còll ch’ a fa mäl l’é pensär che il cozi i sìon andädi acsì par ‘na cuestjón äd publicitè e mìga äd giornalìzom. Al mè compit l’é catär su contär notìssi, mìga catär su sold par ilj insersjón. Epur adésa són mi a costär tròp...".


E la "notìssja", còlla ch'à dispjäz äd pu, l’é riväda pròprja in-t-al gióron dal sò compleàn.
"No, stà mìga scrìvvrol, però l’é vera. A compìss 38 ani. J ò cminsè da giòvvon a fär còll mestér chì e son fjér p’r indò son rivè, parchè a ‘n gh’ò mäj avù di zbutón. Parècc’ al dév a l'editor, a l'Unjón parménse ädj industriäl. I m’àn sémpor lasè lavorär e fär al mè compit con il man zligädi".


In-t-la realtè editorjäla äd Pärma tànti testädi "nóvi" j àn sarè. Al sò salut invéci al pär cme un prìmm campanél d’ alärm anca p’r il socetè storiche, cme còlla ädla Gazètta äd Pärma.
"Ànca chì gh’è crìzi, inetti nascondrol. Tv Parma l’à sémpor fat bén dal pónt äd vìssta di ascolt mo la racolta publicitärja l’è in dificoltè. L’è ‘na tàtica comprensìbbil còlla äd mètt’r insèmma il do redasjón . Chiaramént mi speräva äd färni mìga il spézi. Mo al pjàn industrjäl al n’è tòcca mìga a mì..".


Có läsol in chi 9 ani chì ala gvida dal grùp?
"Tant sodisfasjón. Cme còlla p’r i du prémi nasjonäl ricevù dala rivìssta Millecanali p’r Agorà e "il Volo". Mo pu che ätor son contént par còjj cme mì ch’i àn fat la storja äd cla televizjón chì, p’r i giornalìssta ch’j én carsù al mè fjanch. Cme Marco Balestras, Giuzép Milàn, Francesca Strozzi e ‘na colón’na cme Francesco Silva, vón di mè pu bón amìgh. Mo anca tùtti i giòvvon colaborator che pò j àn fat carjéra dopa ésor pasè dédchì".


Cuäl saràl al so futur. E còll äd Tv Parma?
"Mi lavorarò in-t-l'àmbit ädla comunicasjón. Gh’ò al spàli ànca n’ esperjénsa univarsitärja äd sìnch an cme docént, vedrò äd sfrutärla. Al futur ädla tv? Pòs sol augurärom ch’ al sia in linea con al sò pasè...".


(31 znär 2012)