"Il Pagéli di Crozè in djalètt Pramzàn". Pärma - Pescara 3-0 Testo pubblicato sulla Gazzetta di Parma del 2 aprile 2013.

 

(Testo in dialetto parmigiano)

Pärma Pescara 3-0

Mirànt déz : d’ incoragiamént par la cervicäla ch’ l’à t’sarà gnùda  su Sabot sìra, stär lì novanta minud a ciapär di zdél d’acua sénsa tocär gnan ‘na bàla l’é ‘na béla tortura t’al dìggh mì

Benalouane déz : mèttor la firma insìmma ala salvèssa merita al màsim di vót automaticamént  !

Palètta déz : e Shining al gh’ é mètta al sigìl, gol äd prepotensa cme l’an’ pasè, a regola äd brìsscola second mi al fa un finäl äd campionät strepitóz ( acsì Pédor al se frega il màn )

 

Lucaréli déz : anca sa n’ t’é mìga sgnè cme i tò sòcio t’é zughè ‘na gran partìda, al camp al t’à dè ‘na màn e t’è drovè tutt al fizich e l’esperiénsa chi né t’ mancon mìga sicur ! Siv artornè a fär il clasjón da razón ch’ a s’é drè  drisär la baràca ?

Gobbi òt : solita partìda puntuäl cme n’ arlój zvìssor, a tórni a dir, second mi Massimo l’é stè fin adésa al zugadór pu pozitiv e regolär äd tùtta la róza

 

 

Biabiany séz : no, mi a digh, dòpa la prìmma volta ch’ a t’ pas al balón e al s’ férma in-t-na  pòccia, la volta dòpa o t’ al tir su o té gh’  tir pu fort ! O no ? invéci njénta, déz pasag’ a sìnch mèttor e déz volti la bala blocäda in-t-la pòccia ! Gnan Daniele Capra tarsén zbilénch dal Barbjàn l’arìss fat méj

Marchionni òt : anca a Marchino la gamba la taca a girär da razón e se du pu du fa cuàtor, in ch’ la pozisjón lì Calimero second mi al gh’ arà äd nóv a zugärgh ancòrra

 

Ninis sètt : béla partìda e se Dio vól dòpa Chiesa vón ch’ a tira i corner cme Dio cmanda e cme difati ogni volta l’éra un perìccol ! Ancòrra un po’ tròp fumm e pòch aròst, mo un cuälch pas avanti al s’ vèdda

 

Paról sètt : insìmma a ‘n camp “da Paról”, a né t’ podäv mìga zbaljär, sostansa corsa e ‘na cuälca zugäda col pnél cme al cross dal prìmm témp ! A m’ zbaljarò mo mi artórn a dir che col ragas chi al fa un lavor al scur presjóz un bél po’ e mi al  tgnirìss strìch

Amauri déz : déz cme i gol, déz par l’impìggn, déz par la clàsa, déz par la parsonalitè, déz parchè l’é un ragas ch’ al sérca cme prìmma còza äd rispetär e fär divertir i so tifóz, anca cuand al sérca ( e de spèss i gh’ vénon parchè l’é bón ) dil zugädi spetacoläri p’r al pjazér dal pùbblich ! Zò al capél, sjòr zugadór e parsón’na sérja

Sansón déz : ormäj a pòs mèttor su un dìssch, a mi chi zugadór ch’ i m’ fan stravèddor, vlinóz, mortäl cme un cobra, témp äd zógh parfét, séns ädla porta da campjón, a spér sinceramént ch’ al pòsa stär chi almeno n’ätr an’, parchè s’al va avanti acsì a Pärma a gh’ò paura ch’al dura pòch

Cerri déz : di vè mo a San Zgónd có magnìv il bistècchi d’elefant ? Che ràsa äd fizich mama mia, a tutt il manéri lòmmo complimént, in bòcca al lòvv, e téna sémp’r a ménta che cme Pramzàn l’impìggn d’onorär la crozäda al gh’ à da ésor dòppi, fat spiegär da Sandro Melli co vól dir avér la cróza tatuäda in-t-al cór che lu  al la sa

Donadón òt : bravo Mìsster parchè l’à tgnù älta la concentrasjón contra n’aversäri sinceramént a livél scarsìssim, ansì a gh’ vrìss girär la fritäda e dmandär cme sia stè posìbbil ciapär do peri da chilór a l’andäda, parchè l’éra ädj ani ch’ a n’ vdäva mìga al Tardini ‘na scuädra acsì grama !
E PAR FNIR BÓN’NA PASCUA A TUTT E AVANTI CROCIATI !

(Tgnèmmos vìsst)

(Testo di Crociato 63)

(Correzione ortografica a cura di Enrico Maletti)