Il Pagéli di Crozè in djalètt Pramzàn, testo pubblicato sulla "Gazzetta di Parma" del 5 aprile 2011

Hernan pensogh ti sionò l'é nòta mo nòta dabón

(Testo solo in dialetto Parmigiano)

Parma Bäri 1-2

Mirànt déz : al vót l’é par la majètta, la publicitè äd Bill Gates, la paräva al monitor äd windows cuand a s’ pìa al computer

Zacärd déz : partìda strepitóza, incontenìbbil, avanti indrè isìmma a ch’ la fàsa lì ch’ a t’ paräv in moto ! Ah no scùza a s’éra adrè sognär ‘na partìda äd l’an pasè

Palètta déz : centräl sicurìssim, sémpor precìz su l’òmm e pront a fär ripartìr la scuädra, con Lucaréli ‘na copia ch’ a s’ ricordarämma par d’ j ani

Lucaréli déz : anca lu sicurìssim, velocìssim, specialmént in-t-al finäl con socuant intarvént miracolóz

Gobbi déz : zugadór incontenìbbil, par fortón’na ch’ l’é stè decìz äd där via Pavlén, parchè se Dio vól adésa a vdämma di sentonär äd cross parfét

Angelo déz : partìda straordinäria, i zardinér i gh’ aran da arfär la fàsa parchè l’à bruzè l’erba a forsa d’andär avanti e indrè, sinceramént a ’n capìss miga parchè in nasjonäla braziliana a continua a zugär Maicon e Dani Alves e miga col ragas chi

Morón déz : p’r al capitàn al déz l’é par la vója ch’al gh’ à, mo ch’al capìssa che in méza a cl’armäda Brancaleone chi a ’n pól miga saltär fóra njént äd bón

Modést déz : l’éra dai témp äd Di Chiara ch’ a ’n sé vdäva pu un tarsén con di pè acsì bón, ogni cross l’é un colp äd pnél, al Tardini l’é drè dvintär cme al Louvre

Candreva déz : cualchidón al l’à paragonè a Dino Baggio e Tardéli, si mo indòvva, col ragas chi l’é dézmilla volti pu bón che Tardéli dailà, äd Dino Baggio a né s’ n’in pärla gnan

Amauri déz : oh finalmént un déz dabón, gran gol e ancòrra ‘na volta al pu bón in camp, dzämma l’ecesjón ch’ la conferma la regola äd ‘na stagjón e d’un calciomercato dizastróz

Hernan déz : un déz par la vója, e parchè a so béle che in cla situasjón chi i mandaràn avanti lu a mèttrogh la fàcia davanti a la génta ! Hernan pensogh tì sionò l’é nòta mo nòta dabón

Marino déz : al pu fort alenadór ädla storia dal Pärma, parchè cualchidón al gh’à ancòrra di dùbbi, dal rést a sämma tutt cuant imbariägh con tutt al champagne ch’al s’à fat bévor st’an !

Curva déz : al bandierón col Bagna l’é städa sicuramént la còza pu béla ädla giornäda insèmma ai trimìlla putén anca sa gh’é tochè väddor col spetacol chi e a ’s sa i putén al champagne i n’al bévon miga !

(Pramzan dal sas)

(Tgnèmmos vìsst)

(Testo di Crociato 63) (Correzione ortografica a cura di Enrico Maletti)