Il baricädi a Pärma in-t-al 1922. Testo in dialetto Parmigiano scritto da Enrico Maletti

(TESTO SOLO IN DIALETTO PARMIGIANO)
I n’ àn miga scravoltè la storia e gnànca al mond chi sìnch gioron li.
Il baricädi a Pärna j én städi 'na spece äd prologh par còll ch’a sarìss sucés vint ani dopa, in-t al 1943, par man äd ‘na nóva generasjón.
Al primm at important äd la rezistensa l'é stè scritt, second pareccia génta, con al sangov, in-t i nostor bor’gh äd Pärma.
Borogh trasformè in trincei e la Parma come un nuovo Piave, che mormorava, (non contro lo straniero), mo con coj ch' vräva fär il próvi par "la marcia su Roma". I gh’ l’àn caväda con còlla su Ròmma, mo còlla su Pärma no. In chi gioron li a s’era miss insèmma un’ unitè antifasista con; comunista, socialista e catolich, insèmma in nomm di valor d' un pòpol che, cme dzäva Giacomo Ferrari, la sémpor lotè contra il tirannij, l' à dè di fjo generoz al Risorgimént, e sentonär äd condanè al galeri di trist regìmm.

La sméla dil sinch giornädi la s’pìa al 31 äd lujj dal 1922 col siopero legalitäri, nisùnna manifestasión nisón comissi nisón incidént.
Mo però al primm d' agost a s’ comincia a muciär un sach äd camizi nigri in citè, ch’ l' avmenta durant la nota e ala matén'na dopa. Il primmi bujj ala maten'na dal du d'agost in borogh dal Navilli.

E proprja chi a s’ comincia a vèddros il primmi barichädi fati su con ogni sorta äd materiäl su ordin tasativ dal Comität d'asión indò gh’éra di esponént dilj organizasión proletäri e Guido Picelli.
La citè la vén difesa, e la vén diviza in cuator setor. Naviglio e Saffi in Pärma nóva, Bixio e D'azeglio in-t l’ Oltretorént.
Vintidò scuädri d' ot o dez òmmi i difendon al setor ‘d l’Oltretorent; sez scuädri al Navìlli e cuator al Saffi. L'armamént l’éra fat äd fuzil modél 1891, moschètt, pistoli d'ordinansa rivoltéli e bombi Sipe.
Soltant la metè ‘d j ommi la gh’à un fuzil o un moschètt.

Insìmma ai còpp intant gh’é chi s’prepära a vudär acua bojenta sul camizi nigri che intant j’ én rivädi in dezmilla.
A j Ardì dal popol, al corp fondè da Guido Picelli che, durant la rezisténsa, al gnirà ciamè " Il primo reparto Garibaldino", a gh’ aderissa comunista, socialista, catolich e sindacalista rivolusionäri.
Al tri d'agòst ariva Italo Balbo, ch’al mónta al so cuarter generäl in-t l' Hotel Croce Bianca in Piasa ‘dla Stechäda, e al scrivrà in-t-al so diäri: (La città è rimasta impermeabile al Fascismo.)

La batalja la s' pìa azvén a Borogh dal Navilli, cuäzi strichè su dal camizi nigri. Intant a gh'é un scambi äd fuzilädi insìmma al spondi dal torént, insìmma ala riva sinistra, in borogh di Cara, a l'altessa indò gh’é adés la scola Filippo Corridoni, a vén masè al mecanich, Ulisse Corazza, consjér comunäl dal partì popolär.
La maténna dal cuator d'agòst, i barichè i s’ difendon da ‘d j ätor asält.
A vén dè fógh al Circol di Ferovier, a s’ rinforsa il barichädi e intant socuant Fasista i späron dala tòrra äd San Pavol, da Borogh dal Pramzanén e da Via Felice Cavallotti. La sede dal Giornäl il Piccolo la vén dèvastäda, insèmma a còlla dal Partì Popolär e còlla äd l'Union dal lavor.
L'ordin scritt cons’gnè a ‘na stafètta ch’la vén da Borogh dal Navilli, l' é còll äd "Resistor a cost äd morir sul post", intant sòtta il fuzilädi a mora Gino Gazzola, poch pu che un putén, e Carluccio Mora.
In-t al dop mezdì a s’ riva a n'acordi par Borogh dal Navilli, i soldè i vénon dentor in-t-al cuarter e intant a sé zlontana il camizi nigri.
La stésa operasión in-t l'oltretorent, a l’ospedäl äd via d'Azeglio intant a móra Giuseppe Mussini f’rì al gioron primma in viäl Mentana, al so nomm in-t-la lista di mort tra i barichè al sé zonta a coj äd MarioTomba e Attilio Zilioli colpì intant ch’al serca äd socòrror un f’rì. Tra il fili di Fasista i mort i s’ran trentesincov.

Al sincov d'agòst sedi äd partì e ufissi di profesionìssta simpatizant par j insort i venon devastè dal Camizi Nigri.
Värs il vunz ori Italo Balbo al pasa dal pont Verdi e al va finna ala Ceza dil Grasij, in via dei Farnese, mo po al s’ritira davanti al fogh ‘d ‘na mitraja da l'asält ala cambra dal lavor in via Rodolfo Tanzi. A gh’ prova po n'ätor grupp ch’al vén respint dai soldè. Al Vèsscov Monsgnor Conforti , al d’manda ‘na tregua äd pacificasjón e dopa 'na longa tratativa al c’mand di Fasista l'ordina la zmobilitasión.Värs sira i Fasista, zlontané da la citè, i se sfogon a scargär ilj ärmi contra la pensilina äd la stasjón.
Toch dopa Toch, i mobil, i car e il scrani sarvidi par fär su il trincei i van indrè a fär al so solit lavor.
Il barichädi i vénon zmantlädi dal strädi, mo miga dala memoria.
(ENRICO MALETTI)