Tre maestri salumieri Parmigiani. Trì méstor salumér Pramzàn dal sas. Testo pubblicato sulla GAZZETTA DI PARMA del 7 ottobre 2013 nella rubrica dialettale (Tgnèmmos vìsst)

(FOTO DI CRISTINA CABASSA)
(CLICCA SULLE FOTO PER INGRANDIRLE)

 

(Testo solo in dialetto parmigiano)

Trì méstor salumér Pramzàn dal sas.

Chì pasa da pjàsa Garibäldi in-t-i gióron ferjäl vèrs  il sìnch or dal dopmezdì, al pól catär  in-t-al  spàsi  fra ‘l giornalär e sträda Farini, (‘na volta sträda di Gennvéz) trèj parson’ni consudi da tant pramzàn. Si… j én pròprja lor  trì, Bruno Fantuzzi, Bruno Rastelli  Giuliano Fedolfi. Ch’ il trèj  parsón’ni chì,  che adésa j én in pensjón, in-t-la lór ativitè lavorativa j én stè  trì méstor salumér, tant che par rivär  ala lór esperjénsa gh’ é volsù pu äd quarànt’ ani äd lavor. Bruno Fantuzzi, l’à gestì fin dala fén ädj ani s’santa la salumerìa äd via Sassari,  l’é stè al vér  botgär äd cuartér par mjär d’ abitant ädla zona äd San Leonärd, al gh’à sémpor avù n’ òc’ äd riguärd p’r i salùmm ch’ al vendäva, a cominciär  dal nòstor re di salùmm, al parsùtt äd Pärma. Bruno Rastelli, invéci l’é stè al méstor salumér insèmma a sò fradél Giorgio, ädla salumeria in via Repùbblica in angol con via Aurelio Saffi, cuand vón l’andäva déntor in-t-la so botéga al fäva  n’ “aerosol” äd profùmm di pù bón salùmm. Giuliano Fedolfi, fin da j ani stànta, l’à fat crèssor con dal bón parsùtt i putén ch’ i andävon a scóla  tutt  i dì a l’istitùt Maria Luvìggia indò al gh’  äva la sò botéga äd salumér in angol con bórogh Regäl. Trì parsonàgg’ che con i sò cliént i gh’ävon un contàt dirét, còza che incó in-t-i  supermarchè e ipermarchè a ‘n sucéda pù e i parlävon con lór al djalètt pramzàn,  e con al sò lavór j  àn fat la stòrja di salumér a Pärma.

(Tgnèmmos vìsst)

En. Ma.