Il Pagéli di Crozè in djalètt Pramzàn testo pubblicato sulla Gazzetta di Parma del 16 febbraio 2009

Nicola Pavarén al pu bón di Crozè in camp par Pärma Grosseto

(Per il video delle pagelle Parma Grosseto clicca qui)

(Testo solo in dialetto Parmigiano)
(Il Pagéli di Crozè in djalètt Pramzàn)

Pärma Grosseto 4-0

Pavarén déz : stär n’ora e méz praticamént sénsa fär njénta col frèd ch’ a gh’ éra a mèrita al masim di vót ! fùsson tùtt cme ‘l Grosseto, ah gamba äd sènnor !

Zenón séz : zugär a cuàtor, vól dir stär un po’ pù manciè lì dardè, fòrsi fòrsi méj acsì a né ’t gh’ äv miga ‘na gran inviäda da fär di chilòmetri jerdlà

Castlén sèt : confrónt a Dino un dù, trì cross in pù bén fat, miga un granché però mólt méj che j ùltmi partìdi ch’a gh’éra da mèttros il man in-t-i cavjj

Paci sèt : a stär al statistichi al Grosseto al gh’ äva un sjòr atàch invéci ierdlà gnànca un tir in porta e in-t-l’unich méz perìccol un gran recùpor in area ! avanti acsì

Troést (Toast) òt : lasè in banchén’na a meditär insìmma a la partìda dizastròsa d’Ancón’na, col ragas chi al g’ha mìss dù secónd p’r armèttros in caregiäda ! Bräv bräv bräv !

Lunardén sèt : l’ultma vòlta a són stè un po’ trop cativ con col ragas chi ch’ al dimòstra se non ätor d’avér vója äd fär bén, e con ilj àrïi ch’ a tira l’é béle cuél, béla partida ecco col Grosseto al paräva al Zoratto giùst dabón

Bùdel séz : ancòrra con ch’ ilj orècci lì ? dai ormäj l’ämma capìda, sarìs un lavór da fùrob dmandär scùza e därgh un taj e pensär a cambiär märcia de ‘d chi andär in fónda ! o no ??? consìli valid par tùtt miga par tì e basta

Mariga séz : a ’t zè cme l’é, a Carpanèddol i s’ én alenè insìmma à di camp strepitóz, artornär a zugär insìmma ai camp äd grùggn cme i nòstor i ’s fan mäl tùtt, sarìss miga méj zugär anca il partìdi äd campionèt al Mundial 82 ? al digh piàn sionò ‘ na cuälca vólpa la gh’ pénsa anca su

Leòn sèt : prónt insìmma a dò situasjón da sfrutär, p’r al rést lasämma pärdor, a partìr da la tozäda! cò dit vè balla coi lupi, sérca äd fär balär un cuälch difensór in pù

Palòschi déz : no mo mì a digh, cme mäj col ragas chi l’é marsì in banchén’na par cuäzi tùt al girón d’andäda ? anca sénsa gol al còrra par sìnch al g’ha ‘na vlontè spaventóza e l’é sémpor educhè e pozitìv coj tifóz ! insòma a s’è capì che mì p’r al ragasén a stravèd ? e garantì ch’ a ‘n són miga l’ùnnich

Vantagè déz : dù gol, al novantézim ancàrra a fär al tarsèn, zugädi da gran zugadór, s ’a gh’ fämma al vaccino a la zvélta chilù andär in fónda al sé fa divartìr, un po’ meno j’avarsäri ! a tutt il manéri l’é la fotocopia dal bulgaro dabón l’ ìv vìsst ? mì a ’n sò gnànca cme a ’s ciäma tant al ciàm Hristo

Guidolin déz : Dio gràsia mìsster ch’ al gh’é lù a tgnìr la stàla saräda, l’éra un bél pò che a Pärma a ’n gh’éra n’alenadór acsì in sintonìa con Pärma, ch’ a né gh’ vól po’ miga chisà che gran còzi, basta fär miga ì pajàss e al Don al l’ha capì sùbit ! Andämma bén bombén mìsster !

Soceté sénza vót : fämma tira e mòla, cualchidón a sé spéta al vót e mi a né gh’ dagh mìga la sodisfasjón äd därgol, acsì a gh’ dagh mìga dil scùzi äd brangonjär ! mo al riva stì sicur ch’ al riva, l’ às äd brìsscola l’é in sacòsa prónt da ésor zughè! AVANTI CROCIATI !
(Tgnèmmos vìsst)
(Pramzàn dal sas)

(Testi di Crociato 63 supervisione ortografica di Enrico Maletti)
(Le pagelle in dialetto Parmigiano sono lette da Enrico Maletti)