Il sogno di Maurizio Trapelli "al Dsèvvod" è diventato realtà. Il testo è pubblicato sulla GAZZETTA DI PARMA di giovedi 30 maggio nella rubrica "Tgnèmmos vìsst"

 (FOTO DI ENRICO MALETTI)

(Testo in dialetto parmigiano)

L’insònni l’é  dvintè realtè.

In setémbor  dal 2010 mi e Maurisjo Trapéli, mascra äd Pärma  (al  Dsèvvod),  sèmma  stè  òspit  ädla trazmisjón  TV äd Rete 4 “Ricéti  äd Famìja”,  diréta  da Davide Mengacci registräda  ‘na domenica matén’na a  Pärma in pjàsa  Garibäldi. Par l’ocazjón  Trapéli al  m’ à parlè d’ un sò insònni ch’ al  vrèva  ch’al  dvintìssa realtè, però  al gh’ äva  bizòggn  äd la colaborasjón  äd socuànt  amìgh fidè. L’insònni  l’ éra portär  tùtt il mascri  Italjàn a Pärma, e fär dvintär  Pärma la capitäla dìll mascri  alegòrichi  Italjàni. In-t-un  prìmm  témp  a gh’ò dmandè,  sc’ètt e nèt,  s’ l’éra  ‘drè  dvintär mat  parché ‘na manifestasjón  cme còssta  portäda a Pärma, fóra  dal perìod  äd  carnväl, la garìss  avù  bizòggn  äd n’ impìggn  fort bombén  in particolär  p’r al probléma  finansjäri. 

 Dòpa avérogh  lavorè su p’r un pär d’ an’ e avér  catè  in socuànt  asociasjón  äd  Pärma il parsón’ni  giùssti par  crèddor  in cl’ evént  chì  fóra dala cultura di pramzàn,  in-t-al magg’  äd l’an’ pasè, (2012) Trapéli e sòsi  èmma  prezentè  al pùbblich pramzàn  la prìmma rasèggna “Mascri  Italjàni  a Pärma”. Gh’ éra tutt pront ala  fén ädla  stmàna  dal 19/20 magg’ (2012), mo purtròp  l’é  stè  pjén  äd sorprézi, a partir  dala brùtta stagjón,  la sospensjón  in camp nasjonäl  äd tùtti il  manifestasjón  par l’omisìddi äd la ragàsa Puljéza davanti  ala scóla, al teremot  ch’l’ à colpì  l’Emìlja in-t-la nòta  fra sabot e doménica. Po’  par  där al tòcch  finäl  ala sfortón’na  al ricovor  in ospedäl  a l’ùltom momént  dal protagonìssta  ädla fésta, pròprja  lu  Maurìsjo  Trapéli (al Dsèvvod),  ch’al sé fat sostituir a l’ùltom minùd  da n’amìgh. Con còsste  il mascri prezénti  ala manifestasjón j  éron  cuäzi  200 rivädi  da tùtta  l’Itàlja. 

 

 Archiviè al prìmm an’, cme s’ dìz  a Pärma “ al prìmm cavàgn al va bruzè”,  al Comität “Mascri Italjàni  a Pärma”  al s’é  mìss in movimént  p’r  organizär la seconda  edisjón, còlla  äd st’an’,  al 25/26 magg’. Dòpa  n’ an’  äd lavor sèmma  rivè al secónd apontamént, anca  st’an’  gh’é  stè da cambjär  al programa  a l’ùltom momént  cavsa  l’ acua  äd sabot  25, éra prevìsst  ‘na grand  sén’na in pjasa  ädla Giära  ala prezénsa  äd  tutt il mascri  e di pramzàn,  la sén’na  l’é  städa  spostäda  al  Circol  Insàn  a Molèddol.  Par  fortón’na  che  ala domenica al témp  l’à  dè  ragión ala sfiläda  dìll  mascri Italjàni  e dòpa  la vìzita d’ un grupp  äd mascri  a l’Ospedäl  di putén  s’ é  podù  vèddor   ‘na sfiläda  äd mascri p’r il strädi ädla  citè, a paräva  un carnväl  fóra  stagjón  e ogni partecipànt  l’à  portè  ‘na  ftén’na  äd cultura ädla  pròprja  téra. 

 

 La du gióron  dìll mascri  l’ é fnida con la vìzita ala Ca’  ädla Muzica e dal  Són e con n’ ùltma  sfiläda  e l’ ariv in pjasa Garibäldi con la partecipasjón  di  pramzàn prezént.  Adésa anca  se al Dsèvvod  al contìnva a dir  che lu l’é  ancòrra ‘drè  sognär,  bizòggna  dìrogh  ch’ al sé zvélja  e  ch’ al comincia  a pensär  ala tèrsa edisjón  dìll “Mascri  Italjàni  a Pärma” in magg’ dal 2014. Grasja  a l’ insònni  äd  Maurìsjo Trapéli e a ‘n grup  äd vér  amìgh Pramzàn, la citè äd Pärma l’é  dvintäda  la capitäla  Italjàna  dìll Mascri Alegorichi  Italjàni. L’insònni  l’é dvintè realtè.

(Tgnèmmos vìsst)

E.M.