"Il Pagéli di Crozè in djalètt Pramzàn". Palèrom - Pärma 1-3 Testo pubblicato sulla Gazzetta di Parma del 21 maggio 2013.

(Testo in dialetto parmigiano)

Palèrom Pärma 1-3

Mirànt déz : l’ùltma partìda, ansi l’ùltma mez’ora l’é städa la pù béla da cuand a t’ si a Pärma, parädi da Marsjàn, fin trop tant ch’ a té t’ si fat mäl !

Bajza séz : batù da ‘n gran gol d’un gran zugadór, in compéns tanta cälma e sicurèssa e fòrsi la partìda giùssta p’r ezordìr in serja A ! In bòcca al lòvv lòmmo

 

Rosi séz : in prinsìppi un colabròd, po’ a metè dal prìmm témp al diesel al s’é scaldè e i prìmm buz in-t-la diféza dal Palèrom j’én gnu pròprja ded lì !

Còvva séz : partìda discreta, mi tutt somè al tgnirìss par st’ an’ ch’ vén, anca parchè second mi al raport cualitè/prési al va benìssim, pu o meno cme a l’Esselunga

 

Palètta séz : par vint minud l’é stè un film äd Dario Argento, i rivävon zò dapartùtt, sa ’n gh’éra mìga Mirànt a gh’éra da ciapär cuàtor péri, dopa par fortón’na a v’ si arpiclè mo che spavént

Lucaréli séz : e cme al solit andì via in copia ti e Paletón, sperèmma che st’ an’ ch’ vén al faga cme ti e ch’ al pòsa stär chi, anca parchè s’ al va via al rìssgia second mi äd fär la fén äd Zacärd, dìggol anca tì che la so dimensjón l’é Pärma

Gobbi déz : la sréza insìmma ala torta ! A gh’ mancäva ätor che al gol par celebrär un campionät strepitòz ! A l’ò béle dìtt e al dìggh anca incó, Massimo al miljor zugadór äd la stagjón dal Pärma in asolùt.

 

Ampuero sètt : partìda dòpa partìda al ragasòt con la ghìggna da Tex Willer al fa di gran progrés e al mùccia ädla parsonalitè, par fortón’na che un cuälch giòvvon a provèmma anca nojätor a lanciärol

Valdes sètt : méj tärdi che mäj ah Calimero ? Gran gol e béla partìda anca sl’ é véra che zugär contra la seconda scuädra dal Palèrom cuäzi cuäzi a pòs zugär anca mi

 

Paról sètt : al solit zugadór, invizìbbil par chi capìssa pòch äd calcio, fondamentäl par chi invéci äd calcio a n’ in zgàgna un bél po’;

 

Belfodil séz : un gran gol al né basta miga par zgasär sìnch méz decizamént insuficént sia tecnicamént che a livél äd caràtor ! Sarnìssa tì al fornät mo arcòrdot che äd mìcchi té gh’ n’è da magnär un bél po’ prìmma äd dvintär un zugadòr “da prìmma fasa”

Amauri òt : a fòrsa äd tirär al carètt a t’ si rivè in fónda un po’ stràch, mo al véc’ León al n’ à mìga molè fin in fónda e anca jerdlà la sanfäda a t’ l’é pjasäda ! Confermè sénsa ombra äd dùbbi

Donadón sètt : nóv e sìnch i vót di du girón, la médja l’é sètt, anca se p’r un mezètt ch’ il mézi paròli e second mi al pè tgnù in dò ( o trèj ) scärpi, i m’ àn dè fastìddi un bél po’ e mìga a mi e basta ! Dai eh Mìsster che a Pärma sa sé gh’ résta a gh’é da restärogh  vlontéra sionò njént !

AVANTI CROCIATI

(Tgnèmmos vìsst)

(Testo di Crociato 63)

(Correzione ortografica a cura di Enrico Maletti)