"Il Pagéli di Crozè in djalètt Pramzàn". Pagelle stagionali 2012/2013.Testo pubblicato sulla Gazzetta di Parma del 24 maggio 2013.

(Testo in dialetto parmigiano)

Pagéli stagionäli 2012/2013

Mirànt séz : solita stagjón, tutt somè regolära con un cuälch bàs ( usìdi a vód a Chievo e Gènnva ) e un cuälch ält cme domenica a Palèrom ! Un barbér da procés e socuànt  majètti njan da vèddor, mo chi la colpa l’é äd chi t’ ja fa !

Pavarén òt : pochi partidi mo un gran lavor tutt i di a Colècc’, vón äd chi zugadór fondamentäl p’r al grup e p’r i compàgn ! Confermè ancòrra da mi !

Bajza séz : n’òra p’r ezordir in serja A, e l’é béle ‘na gran sodisfasjón! Se po’ al srà bräv cme  sperèmma a sarèmma tutt contént

Benalouane sètt : al genio ädla lampada l’é partì col freno a man tirè e po’ pjan pjanén l’à dimostrè d ésor un zugadór pu che discrét che con j’àrjj ch’ a tira e i budget ch’ a gira a Pärma al gh’ pól stär ecome

Zacärd séz : purtrop par nojätor e par tì Miclón a t’é fat ‘na sèlta che boh, a gh’ l’ò ancòrra da capir ! S’ la l’à capìda al tò portafój va bén, mo sionò pròprja l’é stè ‘na còza sénsa séns andär via, ti zughè zéro, nojätor in gran dificoltè

Còvva séz : a s’ pól giudicär pòch, subìt j’éron pu il zbarädi ch’ al däva in-t-i garlètt che al balón, po’ al fat d’ésor rivè in-t-al perìod pu brùtt e socuànt infortùnni in l’àn mìga iutè, guardèmma st’ an’ ch’ vén cóll pól fär su s’al résta

Gobbi déz : par Massimo l’oscar ädla stagjón ! Par mi nùmmor vón in asolut cme j’ ò béle scrìtt, e dato che cój nòstor budget a né s’ podèmma parmèttor né Cabrini né Roberto Carlos, fämma firmär Massimo subìt par st’ an’ ch’ vén, magara con n’alternativa e prenotèmma un pär äd taljand da Baistròch  ( vón subìt ) parchè al né résta mìga séns’ òli e dòpa sarìss nòta

Lucaréli séz : Girón d’andäda ch’ a t’ paräv scapusè in-t-la pisina äd Cocón, po’ dòpa Nadäl j’én städi pu il fésti indó  t’é tribulè, anca se in fónda t’é t’ si arpiclè bén; a són contént ch’ a t’é rinovè parchè prìmma o po’ a gh’ la cavarò a conòssrot che col cafè lì oramäj l’é frèd

Mesbah sìncov : al fradél pù grand äd Giovinco al doväva ésor l’alternativa a Gobbi e invéci a pärta un pär äd partìdi a Gobbi gh’é tochè fär i straordinäri che cuäzi cuäzi riva ì sindacät a fär ädla confuzjón ! E po’ i gh’ dävon anca sémpor dil braghètti do mzùri pu lärghi ch’ al paräva Bagonghi !

Palètta sètt : la me sperànsa l’é ch’ a t’ pòs restär chi ( che second mi l’é la tò dimensjón parféta ) anca sa péns ch’ a t’andrè via ! La stagjón anca par tì l’é städa un po’ da montagni rùssi anca se par fortón’na al pu dil volti a t’ si stè p’r aria e mìga sòtta e – còza pu importanta – profesjonalitè e impìggn al màsim fin a l’ùltom second äd l’ùltma partìda ! Bravo !

Rosi séz :  grèssta äd gal a t’ podrìss fär molt, molt méj äd còll ch’ a t’é fat anca se – par mi personalmént – a tirär il sòmmi a té m’ si mìga dispiazù, mo col fìzich ch’ a t’ gh’è, con la tò corsa e anca ‘na bón’na técnica, a gh’ manca che ‘na brìza äd conisjón in pu e a t’ pól dvintär un zugadór ch’ al pól mirär anca bén pu p’r aria

Santacróza du : a n’ so mìga có s’ gàbja adós, purtròp a s’ tòcca giudicär còll ch’ a fa in camp, e il pòchi volti che al Mìsister al l’ à mìs su l’é stè al terór totäl, confuzjón, sémp’r in ritärdi, fóra forma, pòch concentrè, insòmma cära al mè ragas par st’ an’ ch’ vén indò a t’ sarè fa a l’arvèrsa äd col ch’ a t’é fat st’ an’ e la stagjón la srà parféta ! Semplicìssim no ?

Ampuero sètt : un pas par volta e un po’ äd fiducia e partìda dòpa partìda còll ragas chi, béle con la ghìggna äd chi a ’n scärsa mìga, al pär muciär sémpor pu fiducia e parsonalitè ! Da tgnìr e därogh fiducia !

Aquah sètt : a livél äd pìlla al la sa Pédor, mìga mi, a livél äd camp un grosìssim erór; còsste chi l’éra còll ch’ a coräva e al gh’  metäva al fìzich anca par ch’ j ätor in- t-un centorcamp alzér e con pochìssima corsa, e da cuand l’é gnu a mancär a s’é sintì ecome

Galòpa sètt : gran bél inìssi, la solita sfortón’na e un ricùppor ch’ al fa bén sperär par st’ an’ ch’ vén, anca parché ormäj a t’ si äd ca’ e a ’n crèdd mìga ch’ a t’ pòs fär il valìzi st’ istè ! Dai contìnnva  alenärot dur e sperèmma che la sfiga la s’ gira da n’ätra pärta ‘na volta par tùtti

 

 

 

Marchionni séz : strepitóz girón d’andäda, da znär in avanti é gnù mancär la benzìna e l’é städa nòta, anca parchè a t’é zughè in-t-na pozisjón nóva; dai adésa anca par tì un gran bél taljand ( e fòrsi a t’ gh’é da fär anca la sìnngia e la distrubusjón ) e, s’ e vdèmma in ritir

Mariga zéro : cära al me Vatusso, zéro l’é còll ch’ a t’ si sarvì al Pärma purtrop ! A  ciamäva Swarowsky al capitàn Cardone mo ti  t’al bat déz a zéro, al fat l’é ch’ a n’ èmma dè via vón san par tórni vón che purtrop j’ ultom du gir a Pärma l’é pu dal fizioterapìssta che in camp

Morón òt : Capitàn vól dir ésrol anca fóra dal camp, e Morón l’à dè l’ezémpi äd có vól dir in-t-i fat, mìga a paroli, fondamentäl pu che tanta génta ch’ la va in camp ! N’ätr’an’ meritatìssim con la crozäda adòs

Ninis cuàtor : al né pär gnanca infàm, al né pär; parchè cuand al va in camp a né s’ capìssa mìga cuäla la s’ sia la so pozisjón, e l’é un po’ brùtta da dir, mo anca al Mìsster a pär ch’ al né gàbia gnanca provè pu äd tant a catärla

Paról sètt : e chi mì a m’ tór’n a ripétor, par ‘na scuädra cme al Pärma un zugadór cme Paról l’é tanta roba, l’à cors pu lu da lu che tutt i centorcampìssta mìss insèmma, al riva a tirär, al fa di gol e al recupera un sach äd balón parchè taticamént l’é bravìssim ! Un Dinén Baggio ( Dinén parchè Dino l’é ùnnich ) da tgnìr strìcch e al tèrs pòst dal me pälch parsonäl

Strasser sénsa vót : cme  s’ fa  där al vót a vón ch’ al zuga du minud ? A ‘n saral mìga còll Strasser ch’ al scrìvva j’ artìccol da Fornóv e da Tréns e dato ch’ al zugäva pòch a l’ì tòt in Gazètta a fär al second lavór par cäz ?

Valdes cuàtor : du gran gol, mo in méza ‘na stagjón äd tribulamént, dò märci in meno che l’an’ pasè, lént, prevedìbbil, imprecìz, la sensasjón l’é städa ch’ a sia fnì l’efét sorpréza, e sarìss stè méj sa t’ fùss tornè a zugär indò t’é sémpor zughè ! Calimero voltär pagina parchè n’ätra stagjón acsì la sarìss dura da mandär zò

Amauri òt : al Re Leone, con tant äd crinéra, in-t-al fìzich e anca in-t-i fat ! Pónt äd riferimént par tutt in camp e fóra, grénta da fär vèddor ai ragasén ädla scóla calcio, socuànt gol spetacolär e la conferma par st’ an’ ch’ vén, anca parchè parlèmmos cjär, con còll ch’ a pàsa al convént, Amauri p’r al Pärma l’é tanta, tanta roba, second post  dal pälch apén’na apén’na sòtta  Gobbi

Belfodil sìncov : e chi invéci al discors l’é praticamént a l’arvèrsa, i nùmmor i gh’én tutt, al caràtor e la manéra äd savér vivor in méza a un grup invéci par njént ! Vón che a vint’ an’ al fa du gol in cróza e al s’ monta béle la tésta fòrsi sarìss stè da där via béle in znär, e sa gh’ ò da dir la mèjja fin in fonda mi al darìss via anca adésa sénsa trop rimpjant

Biabiany cuàtor : insòmma lòmmo, mo có gh’  vól a färot enträr in-t-la tésta i témp e i movimént d’un zugadór äd balón ? E si ch’ a ‘n crèdd mìga che al Mìsster al né gàbja provè ogni alenamént, mo tì a t’ pär pròprja alérgich, corsa, corsa, corsa e po’ basta, sa gh’é un mur davanti a té gh’ pìcc’ contra, a t’ fè su vìnt avarsäri mo po’ strìcca strìcca njént äd bón o cuäzi ! A ‘n gh’é mìga restè ‘na cuälca casètta d’Hernan a Colècc’ ! A gh’ n’é bàsta p’r imparär tutt !

Cerri òt : naturalmént n’è mìga p’r al cuärt d’ora mo par la fiducia e la speransa che n’ätor pramzàn al pòsa ezultär da chi a pòch con la crozäda adòs ! E cme t’ò béle dìtt sta atàca a Sandro Melli par capir có vol dìr avérgla tatuäda insìmma ala péla la nostra maja ! Dai eh lòmmo avanti acsì

Paladén zéro : väla al discors fat par Mariga e in pu i déz minud ch’ al va in camp a pär ch’ al la faga par piazér! Stal chi anca st’ an’ ch’ vén o Pédor al fa al miracol ?

Sansón òt : al cobra, spietè, mortäl, catìv, bón, inteligént, bèch äd fér ! Gran scoperta e zugadór importantìssim a livél äd pónt cój sò gol ! E po’ al dìd a mèttor a tazér la curva di gób al Tardini dòpa al gol al väl da lu al vót ! Ecco chi Pédor a väl al discors ezatamént a l’arvèrsa, da tgnìr strìcch a tutt i còsst, vénda Belfodil e Paladèn mo chilù no e po’ no

Donadón séz : Mìsster a dìrla tùtta second mi al décim pòst con ch’ la róza chi l’é un gran bél rizultät, però da Nadäl a gnir adésa l’é städa tùtta n’agonia,  e chi du o tri méz äd tgnìr al pè in dò ( o trèj ) scärpi cuand la bärca l’éra in méza ala timpésta i ‘n m’ én mìga piazù bombén ! St’ an’ ch’ vén patti chiari e amicizia lunga cme a s’ pjäz a nojätor valabén !
 AVANTI CROCIATI

(Tgnèmmos vìsst)

(Testo di Crociato 63)

(Correzione ortografica a cura di Enrico Maletti)