Realizzato da Pietro Maletti
(Testo in dialetto parmigiano)
Bològgna Pärma 0-0
Pavarén sèt : l’ùnnich vot con un parchè, un pär äd parädi in-t-al prìmm témp e ‘na majètta antinébia, parchè in Emilia a n’ é s’ sà mäj ch’ l’ à pòsa calär a l’improviz e ti t’è mìss il man avanti
Zacärd cuàtor : Miclón, la sensasjón, gnanca tant cuatäda, l’é ch ’a t’ si ‘drè fär al compitén e njénta äd pù ! A m’ son adrè zbaljär ? Próva a dimosträr’l in camp
Palètta séz : in cla partìda chì, a n’ét gh’è gnanca avù da tribulär un granchè, méj acsì valà
Lucaréli séz : idem cme al solit col tò zmél, con ‘na partìda acsì “blocäda” il pónti i girävon ala lärga, t’è fat al comént giùsst ala fén, che cuand la partìda l’é acsì brùtta, l’é facil che i difensor i sìon i pu bón in camp, e acsì l’é städa jerdlà par ti
Gobbi sìncov : có dir äd Gobbi ? Sinceramént a ‘n m’arcòrd gnanca s’ l’ à zughè, al n’é mìga un grand complimént mo gnan ‘na grand crìttica, con l’aria ch’ a tira stär in-t-i prìmm dan l’é tùtta salute cme la maja äd lana
Valiàn sìncov : un pò cme Gobbi, un lavór al scur, tant al scur ch’ a ’n t’à vìsst nisón ! Co sit tìmmid par cäz ?
Morón séz : Capitàn, la còza pu importanta l’é ch’ a s’ sia miss a post tutt a ca’ con còll ragas, p’r al rést a n’ in parlämma domenica ch’vén
Musacci séz : péz che domenica indrè, a gh’éra da spetärsol, a suceda sémp’r acsi, e pò a dirla tùtta l’é städa ‘na partìda talménta inguardàbil ch’ a s’ fa fadiga a dir chi à zughè bén e chi mäl
Galòpa sìncov : a m’arcord un sèrt Piacenti in serie C ch’ l’andäva pu pjan che còll ragas chi ultmamént, mo dòpa pu nisón… a ’n gh’é mìga un lavor specìffich par färol acelerär un brìz ?
Valdez cuàtor : né cärna né pèss, ch’ al n’ é s’ ciama pu “progét”, e che adésa i la ciamon “follia”, second mi continuär a fär gnìr in sa dil mézi vigòggni cme chilù e socuànt ätor cme s’é drè fär da un pò trop témp ormäj, l’é ciapär p’r al näz la génta e basta !
Giovinco du : la partìda pu brùtta äd l’an’, probabilmént in-t-na pozisjón anca zbaljäda ! Anca parchè tri atacant zéro tir in porta l’é cuäzi matematica, a meno ch’ a ’n té t’ ciäm Barcelón’na, mo a Barcelón’na i gh’ àn l’abitùddin äd fär di fàt e mìga dil ciàc’ri cme chi
Flòccari cuàtor : al conträri che col Siena a t’è fat ‘na gran fumära mo cuand a gh’é stè da mèttor insìmma al piät l’aròst, a t’ l’è strabuchè e nojätor a sämma restè con la fama
Donadón sìncov : Mìsster, sinceramént ‘na roba inguardàbil cme còll sbordàcc’ äd Domenica l’éra difìccil da progetär ! E anca a lu, prìmma ch’ a sia trop tärdi, dato ch’ a s’é tochè sorbìros Pellè, adésa Valdès, Biabiany e Floccari, sìnch gol in-t-un girón, mi a m’ séd al tävol dal conchén con la màta, HERNAN !!! E di che via da Pärma invéci che lu ch’ i gh’ vàgon d’ j ätor, còjj che in-t-al cór ì gh’ àn la maja bjanca e nigra e mìga la crozäda !
Avanti Crociati !
(Tgnèmmos vìsst)
(Testo di Crociato 63)
Post
Nessun commento:
Posta un commento