Il Pagéli di Crozè in djalètt Pramzàn, testo pubblicato sulla "Gazzetta di Parma" del 9 gennaio 2012

Realizzato da Pietro Maletti
(Testo in dialetto parmigiano)
Inter Pärma 5-0



Mirànt zéro : a s’ vèdda ch’ a t’ cardäv d’ésor ancòrra al Maldivi, parchè a t’ gh’ äv ‘na velocitè a butärot zò cme cuand vón al va zò par zacuäros insìmma a ‘na zdraja in spiagia

Zacärd zéro : ciapär novanta minud äd rumba da Alvares e Nagatomo la gh’ vól pròprja tùtta ! Vè Miclón próva un pò artornär còll äd du ani fa e ala zveltén’na ch’ l’é méj


Brandao zéro : cme s’ dìz in latén ? Nomen omen ? Valà che chi latén li i l’ à sävon lónga bombén ! Chilù l’é stè in branda tùtta sira. Gh’éra d’ andär in Portogàl a catär vón acsì ? A gh’ n’é basta d’andär a Fognàn al sabot dopmezdì ch’ a gh’ n’è di sentonär


Palètta zéro : sémpr’in méza cme ‘n giovedì… sìnch gol da la corsia centräla e ti gnan ‘na volta ch’ a té gh’ si stè atàca, partìda dizastróza, certo che cme centräl i dù Rocco dal Marsolära ädla fén ädj ani 80, a vojätor du i ’v dävon äd tàch dabón


Gobbi zéro : sul prìmm gol Milito l’à zughè a nascondén e pò l’é saltè fóra par fär tana libera a tutt ! E da còll momént lì la libartè par lor l’é städa totäla


Biabiany zéro : con ti, a se vdämma lundì sira a rai3, a chi l’à vìsst !


Galòpa zéro : l’é blizghè pu lu jerdlà sira che Carolina Kostner ai mondiäl ! Sémpr’in téra e ‘na velocitè che Carlo Sassi al n’ é sarìss miga dvintè acsì famóz parchè la movjóla con chilù l’é al naturäl, a ’n sarvìssa miga fär andär pjan la casètta


Morón zéro : ormäj l’é ‘na via crucis ogni fésta. Capitàn sa ’n tè t’ mètt mga in tésta äd fär cme t’ ò dìtt mi, cioè äd pjär al sarvél, parchè il gambi i van molt meno che da chi indrè


Modést zéro : che partidàsa ! Mäj vìsst al balón, e la sensasjón che pròprja a San Siro al gh’ è sia capitè par cäz


Giovinco zéro : un pär äd tir e njénta äd pu, e ‘na volta ch’ a gh’éra da ciapär la scuädra par màn a t’ si sparì cme tutt


Floccari zéro : socuant colp äd fiorètt, bél par l’estética, mo par la sostansa pròprja zéro, cme su cóll gol zbaljè a porta vóda !


Colomba zéro : Mìsster, sinceramént, vón ch’al prezénta col spetacol pietóz ch’ a s’é vìsst e al téna a cà ancòrra ‘na volta Hernan, l’é ora ch’al faga il valizi sénsa sé e sénsa ma e al vaga fóra dai pè, lu insèmma a còll che äd ch’ la situasjón chi l’é l’architètt e a còll ch’ l’é al padrón dal vapor, che a Pärma, ormäj, ä ’n n’in podämma pu äd fär dìl figuri da cicolatén adrè ch’ l’ätra par colpa vostra ! L’é ora äd catär l’uss ‘na volta par tùtti !
(Tgnèmmos vìsst)
(Testo di Crociato 63)

(Correzione ortografica a cura di Enrico Maletti)