"Il Pagéli di Crozè in djalètt Pramzàn" Testo pubblicato sulla Gazzetta di Parma del 28 novembre 2012 Pärma Inter 1-0

(Testo in dialetto parmigiano)

Pärma Inter 1-0

Mirànt  déz :

Majètta invernäla antinébia, precìz, puntuäl e trancuìll par tùtta la partìda, e j’arbatùdi se Dio vól a t’ j’ è deviädi  da ‘na pärta e mìga in méza !

Rosi  òt :

petnè cme Kocis, gran partìda con ‘na gamba sacagnäda fin da l’inìssi, a t’é tgnù dur e ansi pjan pjanén a t’ si carsù par gnir fóra in-t-al second témp cme a t’ fè sémpor ! Un zugadór a dimensjón Pärma, sa fùss par mi a provarìs a comprèrol sùbbit

Zacärd déz :
Capitan Miclón parfét, e si che Milito e Palacio i  n’é ‘n mìga du atacant simpatich da marcär, mo tra tì e Palètta a si stè un spetacol p’r intenditór, n’ intéza ezemplära e socuànt finèssi a lìvél äd tatica e técnica da zbarlecär’s ì barbìz

Palètta déz :

du o trì intarvént da autentich  campión, dur cme ‘na ròcia, precìz e tempìssta cme n’arlój, inteligént e furob cme ‘na vólpa, un zugadór da primìssima fasa, mo stèmma mìga dìrol trop fòrt sionò a Znär a gh’ vén la fila a picjär ala porta äd Pédor

Marchionni déz :
Marchino al gh’à du pnél al pòst dil scärpi, e ogni pasag’ l’é ‘na penläda d’avtór, sémplic’, precìz, concrét, e cuand a gh’é ch’ il cualitè chì a s’ pól zugär fin a cuarant’ an’ ! Second mi l’é artornè ancòrra pu delisjóz äd cuand l’éra andè via

Valdes òt :
parténsa con la ridòtta e al fréno a man, second témp invéci con la sésta märcia fìssa e al turbo tachè, un finäl strepitóz con la batècca da diretór in man a detär al témp a n’orchéstra strepitóza che par stär in téma äd lirica l’é stè un autentich “crescendo rossiniano"

Gobbi:

A m’ vén da rìddor a pensär a Marino, al profeta dal calcio ch’al n’é gh’äva capì njénta e tutt il fésti al gh’ fäva fär dìll figuri da cicolatén; andè via Marino in du an’  l’arà zbaljè dò partidi si e no, tra l’ätor in-t-na pozisjón importanta bombén p’r al zógh  e tutt il partidi al pär miliorär! Bravo Massimo profesjonìssta ezemplär!

Aquah òt :

prìmm témp cuäzi da man in-t-i cavji, second témp sémpor méj, finäl adritura prepotént, gran béla partìda, mo ‘na curiozitè, la märca dil scarpètti cò ela Rowenta par cäz ?

Sansón déz e lode :

bél e du gol decizìv par do vitorjj, méj d’ acsì l’é imposìbbil fär, e bravo second mi anca al Mìsster a färol crèssor pjanén pjanén par bruzärol mìga, e cme difati pu che bruzäros al fa bruzär ch’j ätor

Biabiany nóv :
 incontenìbbil strepitóz, esaltant, però tato dai ‘na volta ogni tant riva in fonda e càta al témp äd fär la zugäda par la scuädra cój témp giùsst; a tutt il manéri Jesus jerdlà sira a t’ l’è imbarjaghè tant che s’ i gh’ fävon la prova dal balonsén i gh’ ritirävon la paténta a vìtta

Amaurì òt :
al Re Leone, con tant äd ciòmma e vója äd lotär ! L’é un pò ch’ al fa fadiga a sgnär, in compéns al lòta sémpor cme un leon e al sarvìssa ala scuädra anca cuand al né fa mìga di gol.

Donadón déz :
lesjón äd tatica, äd preparasjón psicologica, d’organizasjón, in pochi paroli lesjón totäla d’ un fuoriclàsa anca in panchén’na  dòpa ch’ l’é stè cme zugadór ! Sperèmma con tutt al cór che a Pärma al gh’é pòsa restär p’r un bél pò dabón parchè al SJÒR Roberto l’é n’alenadór e n’ òmm cme in gir a s’ n’ in càta pòch !

Curva Nord e Boys déz :

 finalmént ‘na gran béla curva, con tanta vóza e tant colór, cme l’éra da un bél pés ch’ an sé vdäva mìga ! Complimént anca ai tifóz ch’ i n’ è’n  mìga stè da meno ala scuädra jerdlà sìra, in-t- n’ätra nòta magica al Tardini ! AVANTI CROCIATI

(Tgnèmmos vìsst)

(Testo di Crociato 63)

(Correzione ortografica a cura di Enrico Maletti)