Pärma Verón’na 2-0
Mirànt cuìnndoz : mi cuand j’ò vìsst Perin e Sirigu marcordì a Madrid, a
m’é scapè da rìddor ! Sperèmma che da chi a du méz P&P i s’arpìcclon e i t’
pòrton in Brazìl parchè dòpa Buffon a ’n gh’ é nisón ätor méj che ti in Itàlja,
pòch ma sicur
Casàn cuìnndoz : barbètta l’é sémpor pù sicur,
puntuäl, precìz e inteligént, e par chi n’ in sa äd balón, la djagonäla su Toni
dal second témp l’é n’ intarvént da gran zugadór ! A m’ scapa dìtt che sa zuga
Abate in-t- l’Itàlja al gh’ é podrìss
zugär anca lù sénsa probléma !
Lucaréli cuìnndoz : Capitàn có dir, j’ ò fnì il paròli, i complimént, a sèmma tutt
adrè sognär e a ’n vrìsson pù zveljäros
da ch’ l’insònni chi, tgnèmma dur n’ätor du méz e guardèmma cuand a són’na la
zvélja indó sèmma mo béle adésa a ’n podèmma che dir gràsja a tutt par l’insònni.
Gobbi cuìnndoz : Massimo un po’ cól fjè
curt in fónda, mo al Mìsster al l’äva dìtt ch’ a ’n t’ér mìga ancòrra al sént
par sént, giùsst al cambi con Molinär e dai che adésa vén al bél
Gargàn cuìnndoz : topogigio l’éra
dapartutt, e cme són adrè a dir da un
bél po’ cuand al zuga la bala còmda l’é un medjàn ch’ a gh’ n’é pòch in gir ala
so altèssa, da du méz veramént a di livél mondjäl
Marchionni cuìnndoz : Marchino un prìmm
témp da incornizär, al second témp il gambi j’àn cminsè a pezär al dòppi, elóra
t’é zughè äd fjorètt, a tutt il manéri con la batècca in man da diretór
d’orchéstra a t’ vè bén bombén, a t’ manca ätor che al papillon che insìmma ala
crozäda al gh’é starìss anca bén
Paról cuìnndoz : mi ch’ a són un sò
stimadór ädla prìmma òra ( mìga par vantärom mo al són stè anca äd Crespo
socuant ani fa ) a straväd sémp’r äd pù par còll ragas chi, méz äla modèrna cme
a gh’ n’é poch in gir, complét e, còza ancòrra pù importanta, un ragas modést e
con la tésta insìmma al spàli, cme dal rést tutt i so compagn
Biabiany cuìnndoz : eh si, ormäj l’é
uficiäl, al biónd l’à mìss su la maruga, e che maruga ragàs : jerdlà l’é stè
taticamént parfét, esensjäl e precìz, e dato che fizicamént l’é sémpor stè do
spani sóra a tutt, a s’ catèmma in ca’ un zugadór da lisäros i barbìz !
Casàn cuìnndoz : sjòri e sjòr, a v’ prezént al
zugadór pù fort dal campionät, tutt il fésti decizìv con dil zugädi che un
zugadór normäl gnànca al s’insòggna ! Adésa a vój vèddor chi tózon su d’atacant
p’r andär ai Mondjäl, mo andär in Brazìl sénsa Fantantonio sarìss cme andär in
Dòm par bjastumär
Palladén cuìnndoz : al masim di vót anca par
Palladén. Ch’ l’ älsa la màn a chi j ’arìss scomìss du bòr su còll ragas chi,
mi par prìmm, e invéci anca gràsja ala serenitè dal Mìsster e äd tutt l’ambiént l’é ‘drè dir la sòvva e s’al sta bén arcordämmos che
cój pè al pärla la stésa lénngua äd Casàn, la lénngua di bón
Schelòt cuìnndoz : béle dù gol, e n’é miga
fortón’na, mo vól dir che chi va su, l’é pront, concentrè e al sa parfetamént
có fär ( al stés vót al väl anca par Molinär, Acquah e tutt còj chi ’n n’ àn mìga
zughè jerdlà )
Donadón cuìnndoz : Mìsster, sèmma ‘drè sfiorär la perfesjón, che po’ la sarìss anca
nojóza no ? Elóra avanti acsì, parfét al 99,99% e…. có dìzol lù provèmma a fär
un traplón al Milan domenica ch’ vén ? Sémpor par via che ch’ l’insònni chi l’é
trop bél e nisón a gh’ à intensjón äd zveljäros fin ai prìmm äd Mägg’ !
Curva Nord, Boys e Stadio Tardini cuìnndoz : e
adrè ala scuädra anca la prestasjón ädla curva e di Boys, gran tifo par novanta
minùd con vóza bandéri e colór, e po’ che emosjón sintìr i distìnt fär partìr
un Pärma Pärma cme da chi indrè… l’é n’epidemia che sperèmma la pòsa tacär a pù
génta posìbbil e ch’ la sia incuràbil ! PÄRMA PÄRMA PÄRMA ! AVANTI CROCIATI !
(Tgnèmmos vìsst)
Testo di Crociato 63)
(Correzione ortografica a cura di Enrico Maletti)
Post
Nessun commento:
Posta un commento