"Il Pagéli di Crozè in djalètt Pramzàn" Testo pubblicato sulla Gazzetta di Parma il 18 settembre 2012. Napoli Pärma 3-1

(Testo solo in dialetto parmigiano)

 

Napoli Pärma 3-1

Mirànt sìncov : second mi, second mi…….s’at stè in porta invéci che gnìr fóra, a né t’ fè miga rigór e Pandev al né fa mìga gol, purtrop l’é stè n’eror ch’ l’à condisjonè la partìda e al risultät, voltär pagina ch’ a n’é sucés njént dai

Rosi séz : un pò tròpa confuzjón, fjóla però  äd la gran vója äd fär äd còll che in pramzàn a s’ ciama bècch äd fér ! Continua acsì che second mi la va bén e a s’ podämma cavär parècci sodisfasjón

Zacärd sìncov : cära al mé ragas, l’é véra che anca a centorcàmp al fìltor l’éra un pò   impomè, mo li in méza a paräva ch’ a gh’ fùss pasè Mosè e adrè a lu tutt j’atacant dal Napoli

Lucaréli sìncov : sìncov  anca par ti, tropa poca rezisténsa  li  in méza, l’é véra che chi tri li  davanti j’én par mi i pu fort dal campionät, mo i m’ àn sémp’r insgnè che anca ‘na cuälca “carèssa” in-t-i  garlètt  la gh’  vól arfiläda ‘na volta ogni tant dailà

Palètta sìncov : insìmma a l’asjón dal rigor a t’ si restè in méza cme ‘n giovedi, p’r al rést socuànt béj intarvént mo  parècci volti a t’ si andè a chi l’à vìsst  e p’r un centräl al  n’é mìga un gran bél lavor       

Gobbi  tri : eh lòmo, l’éra dai témp äd Marino ch’ a ’n m’arcordäva ‘na partìda acsì brùtta,  anca se la responsabilitè  l’é anca dal Mìsster ch’ al gh’ äva da capir sùbbit che da ti  i t’arìsson magnè viv insìmma a ch’ la fàsa li e invéci al gh’à  dormì su e ciao ( tant al Mìsster l’é un sjór e al capìssa che j’ oservasjón j’én fati parchè a gh’ vrämma bén e basta )

Valdes séz : gran movimént, gran impìggn, un sach  äd balón zughè mo tutt somè ädla gran póra e dil gran pòcci pistädi un pò cme fäva Gasbarón ( fa ti che complimént ch’ a t’ò fàt ) mo dal fóron gnan l’ombra d’aròst

Galòpa sìncov : trop molzén, un pàn äd butér, trop mòl, e i napoletàn  li in méza j’éron tutt di cortél , cme a m’ vén sémpor da dir in sèrti situasjón, al fjorètt in cantén’na  e fóra la späda che li in méza l’é batalja tutt il fésti

Paról séz : un colp äd carambola che gnanca al Filipéli j’al vèddon, mo p’r al rést mól tant cme Galòpa e ancòrra meno parsonalitè ! Dai tato, che a zugär al balón li in méza a gh’é da färos vèddor e mìga zugär a nascondén che còll li  al s’ fäva in cortil a déz an’

Ninis sìncov : bél zugadorén, pas zvèlt, tecnica pu che bón’na, al balón  al la pàsa sémp’r ai so compagn äd scuädra, mo p’r adésa  sa dovìss spiegär a vón ch’ a ’n l’à ancòrra vìsst zugär che zugadór l’é, a ’n sarìss mìga có dir, p’r adésa né cärna né pèss

Belfodil  sìncov : fin a sìnch  minud dala fén l’éra sètt, mo dopa col gol magnè li l’é dvintè un sìncov ! L’éra  ädj an’ ch’ a ‘n vd­­äva mìga un gol magnè acsì, a m’arcord fòrsi fòrsi un Casaroli in sèrja B a Lecce in-t-al 79 ( Bellè  al s’ l’arcordarà sicur )
 

Donadón sìncov : Mìsster un sìncov “costrutiv”, Gobbi l’é stè lasè da lu tùtta la partìda, e pò a gh’ vól dè pu cativérja specialmént la davanti, comuncue al zógh e la sò man i s’én vìsst  anca jerdlà, dai ch’ a sèmma insìmma ala sträda giùssta !

Pino Colombi : Triést 1979 “Ha segnato Fabio Bonci, Ha segnato Fabio Bonci, Ha segnato Fabio Bonci”; la tò vóza a gh’ l’ò in-t-ilj  orècci  e in-t-al cór da 33 an’ e li la restarà par sémpor ! N’ätor tòch  dal nóstor calcio ch’ al s’ n’ in va ! Grasja  äd tutt Pino, fa bón vjàz e saluta tutt  lasù in Paradis !

(Tgnèmmos vìsst)

(Testo di Crociato 63)

(Correzione ortografica a cura di Enrico MalettI)