Realizzato da Pietro Maletti
(Testo solo in dialetto parmigiano)
Cesena - Pärma 2-2
Mirànt zéro : al cäld al t’à fat indormintär in camp, do béli gàti in-t-al momént decizìv ädla stagjón ì s’ gòdon bombén ! Cme ciapär du zmaflón in-t-al muz pu o meno !
Santacróza séz : béla partida, socuanti diagonäli da parfét geometro, mo sul primm gol anca tì ‘na dormida cme al prìmm äd l’an
Lucaréli séz : cuant balón ch’ a t’è tire su jerdlà…. Pu che ‘na scärpa a paräva ch ’a t’ gh’ avìss ‘na sfrombla in-t-i pè, e pò gol gol äd tésta…. Che äd solit a t’ j a fè, invéci njénta…
Palètta sèt : un vót äd pu p’r al gol mo ancòrra äd pu par l’ezultansa, ch’ la dimòsstra ch’ a tè gh’ tén ecome a ch’ la maja chi ! Bravo !
Biabiany cuàtor : al balón l’é ‘na còza fondamentäla cuand a s’ zuga….. al balón, al né vól mìga ciapè a zbarädi a gh’ vól fat il carèssi, un pò cme a un cagnètt e dòpa a t’ vedrè ch’ al t’ obdìssa
Valdes cuàtor : e sì ch’ a sämma zò äd stagjón par la fumära, mo t’é fat pu fùmm ti che la grigliäda ädla fésta a Marsolära, e d’aròst gnan l’ombra
Musacci zéro : la pu brùtta partìda da cuand a t’ si a Pärma, bali pericolózi persi, tir in curva, poca gamba e anca meno maruga, e si che davanti a t’ gh’äv mìga al centorcamp dal Barcellona
Galòpa du : sémpor col freno a man tirè, e acsì la scuädra la va in dificoltè sia davanti che dardè, par forsa, nànno dai dagh äd l’òli che chi a s’ rìssgia seriamént äd gripär al motor, a vól tirè fóra sapa e badil capì ?
Gobbi cuàtor : sarà städa la testäda ch’ a t’è ciapè da Mutu, mo mi un Gobbi acsì stonè a ’n m’ l’arcordäva da l’inìssi äd l’an’ pasè, dai eh ? Tagliand, cambia il gòmmi ch’ l’é ora äd cminsèr al sprint finäl
Giovinco zéro : Picén, va’ t arväddor il casètti äd l’an pasè in col perìod chi e taca a zugär cme l’an’ pasè, parchè a zugär da tì a né t’ vè da nisùnna pärta, e mén che méno al Pärma, ansi si, al Pärma al rìssgia d’andär in B
Floccari séz : purtrop t’è zbaljè al colp äd grasja sionò l’éra un déz ! Un gran gol e dil gran zugädi, mo cóll gol lì l’arìss sarè su al campionät al 99% invéci adésa a gh’ sarà da tribulär mìga da rìddor a guardär al calendäri mama mia
Donadón cuàtor : Mìsster, ormäj la taca a scurtäros la scorta in cantén’na, un pò cme i portafój dopa la cura äd Monti ! Därogh ‘na mòsa par piazér parchè in sèria B a s’ sèmma anca divarti mo ‘na volta ogni 20 an’ mìga äd pu vala bén
Boys vintisìnch : la pu béla còza ädla domenica l’é städa l’impréza äd vintisìnch Boys, prezént al Manuzzi, ch’ j àn fat valér un dirìtt umàn semplicìssim, d’andär a vèddor la partìda äd la scuädra dal cór cme un tifóz basta ch’ sia, sénsa téssri da pajas e con tanta vója äd fär al tifo !
Post
Nessun commento:
Posta un commento