Il Pagéli di Crozè in djalètt Pramzàn. Testo pubblicato sulla Gazzetta di Parma del 23 aprile 2012

                                                                                      

Realizzato da Pietro Maletti
(Testo in dialetto Parmigiano)

Pärma Cagliari  3-0

Mirànt  òt : gran paräda sul zéro a zéro, petnadura un pò  meno e majètta che pù che p’r un portér l’andäva  bén d’ andär a balär al Jumbo äd sòtta

Jonathan déz : ormäj chilù  l’é dvintè al me pupillo, a tutt il manéri  dal tutt a né m’ son miga zbaljè cuand  j’ò  ditt ch’ al gh’ à di nummor mìga da rìddor ! Bibì e Bibò, consìlli  da vón ch’ a n’ in sa, provì andär a Milàn subìt a rinovär al prestit e magàra a ciapär la comproprietè  che second mi a fì  n’afäri

Zacärd òt : corsia saräda su e Jonathan cuatè da razón, cme al pù dil volti, taticamént parfét, ‘na garansja !

Lucaréli òt : parfét e trancuìll par tùtta la partìda, adésa tgnìr dur ancòrra un pär  ‘d partìdi e pò a s’ pól sarär su botéga anca par st’ an’ dai

Palètta òt : codìggn, concentrè e con la ghìggna da catìv cme a m’  pjäz a mi p’r un difensor ! Second mi l’é in-t-al momént äd màssima forma da cuand l’é a Pärma e l’é  ‘drè a infilär  dil  béli partìdi  vùnna  ‘drè  cl’  ätra

Gobbi séz : socuànt vot in meno, parchè pronti-via da la tò pärta j én gnu zò un pär äd volti par colpa äd dormidi  ch’ j àn fat un gran dir, e a t’ pól ringrasjär Mirànt s’ in n’ àn  mìga sgnè,  m’arcmand marcordì ch’ l’é  fondamentäla, ansi äd pù

Valdes òt : Calimero,  ordinè cme ‘na camaréra Filipén’na, tich  tach, tich tach, pù che Valoti  jerdlà a t’ m’è arcordè  Pin, e n’é  mìga un complimént da pòch, parchè Lele l’éra un grandìssim in camp e fóra !

Galòpa sèt : béla partida Rito, davanti a t’ gh’ äv di cliént  tignóz, t’è tgnù bóta e ansi ala fén  li  in méza a t’è  cmandè ti e cuand a s’ vénsa a centorcamp, nóv vòlti su déz  a s’ vénsa la partida

Valian òt : rispóndor prezént e färos catär pront anca cuand a né s’ zuga un granchè l’é ‘na cóza pozitiva, par  ti , par l’alenador, par la scuädra, par tutt  insòmma ! Bravo e contìnnva acsì che adésa a t’ zugarè un pò  pù de spèss

Giovinco déz : a s’ é vìsst subìt ch’ l’éra vùnna äd ch’il partìdi che par j’avarsäri i dvénton n’ incubo, spetacolär  e concrét,  ormäj l’é sicur ch’ l’andrà via, a cóll  pónt chi a spér almeno ch’ al n’artorna mìga a torén parchè arväddrol con ch’ la maja  a m’  darìss pròprja fastìddi un bel pò

Floccari òt : n’ätra béla partìda e ‘na cälma da Zvedéz a tirär al rigor  in-t-un momént ch’ al podrìss ésor col ch’ l’ à mìs la parola “fine” insìmma al discors salvèssa ! Vè balarén, sit pròprja sicur d’andär via ?

Okaka déz : Eddy Trota l’à fat n’enträda strepitóza, déz minud sénsa zbaljär gnanca un balón, vól dir ésor un ragas séri e profesionìssta da razón anca s’al n’é mìga un campjón, mo a Pärma l’é pù importanta la primma  còza, l’impìggn e la serietè

Donadón déz : partìda parféta, scuädra bén mìssa in camp, con n’idea äd zógh bén precìza, in pochi paroli n’alenador da tgnìr strìch, a bón intenditor pochi paroli….intéz ??

Bibi e Bibò déz : par chi al n’ à mìga capì Ghirärdi e Leonärdi, un déz par la béla decizjón  äd stär fóra da cla pajasäda vargognóza ädla riunjón äd Lega, a speculär  anca insìmma a la morta d’ un pòvor ragas ! Bravìssim, vìsst che cuand a v’ meritì un déz al riva subìt e vlontéra ? Adésa però a gh’ ò un bonus p’r un zéro da därov, ch’ a spér ch’ a né gh’ sia mìga mäj bizòggna äd tirär fóra d’ in sacòsa, mo sa dovìss capitär a gh’ ì da promèttor d’acetärol sénsa  protestär ! AVANTI CROCIATI

(Tgnèmmos vìsst)

(Testo di Crociato 63)

(Correzione ortografica a cura di Enrico Maletti)