Realizzato da Pietro Maletti
(Testo in dialetto parmigiano)
Udinéz Pärma 3-1
Mirànt sìncov : gròsi responsabilitè no, mo ancòrra ‘na volta ‘na respinta in méza a l’area ! A t’ mandarò al me amigh Andrea Grulla, (gran portér ch’ al s’é fermè in prìmma categoria, mo tecnicamént parfèt, pu bón che parècc’ portér ch’ a zuga in sèria A al gióron d’incó ), a insgnärot cme s’ fa a deviärla da ‘na pärta
Zacärd sìncov : e tì Miclón a t’al dovrìss savér che il respinti äd Mirant ì rivon in méza, invéci a té t’ si ciapè dormì cme un putén picén cuand al fnìssa äd bevr’al làt
Lucaréli sìncov : bél gol, mo ciapär tri gol d’ in méza a l’area l’é imposìbbil där ‘na suficénsa ai centräl ! Di vè, dato che Pavlén l’ é un pò trop stagiònè p’r ezordir in sèria A, próva magara tì a fär al centravanti che sicur a t’ la zbat déntor pu de spèss che Okaka
Palètta sìncov : e tì cme al tò socio, próva a fär la pónta anca tì che ultmamént a té gh’ ciap pu davanti che dardè, có v’ àni dè ‘na damigiàna äd camomilla l’ätra sira in albèrogh ?
Gobbi sìncov : va bén che a t’ si abitvè a fär alenamént con Pellè e Okaka e po ala domenica a té t’ cat DiNatale, mo al t’à girè d’atorna cme ‘na balarén’na da lapdance col päl e guärda che ti t’é fat la pärta dal päl
Biabiany cuàtor : tato, cuand a t’ cat vón ch’ al va fort cme ti, a vrìss girè la ciäva par metr’in mòt al sarvél, la famóza maruga, mo a m’ vén al sospét che cla ciäva lì la sia cascäda in-t-na bochètta
Valdes cuàtor : alzér cme ‘na piùmma in méza a chi armäri in bjanch e nìgor, a t’ paräv capitè li par cäz e ch’ a ’n té vdìss l’ora äd scapär via
Mariga séz : almeno al s’é fat rispetär, anca sal s’é magnè al gol dal du a du ch’ al n’éra miga pò acsì difìccil, a tutt il manéri in méza a còll njénta ch’ a gh’ämma a centorcàmp, almeno lu al gh’ mètta al fizich ( la conisjón sarìss dmandär tròp, par còlla li a gh’è da pagär ad pu e al sé sa che chi gh’ à da zborsär al gh’ à il vìppri in sacòsa )
Galòpa cuàtor : Rito, a cla velocitè lì vint an’ fa a t’ariss fat si e no al torneo dal Poggio e pò sperär äd catär miga Ravanètt cóntra, sionò al t’ariss spetnè al ciùff parchè l’andäva al trìpplo che ti
Giovinco òt : gran partìda, l’ à predichè in-t-al dezert par 95 minud, lotè cme un leon e fat dil zugädi da ufo, e con n’arbitro normäl l’arìss decìz la partìda almeno sinch volti a partir da l’espulsjón !
Floccari cuàtor : ecco al parchè Floccari l’à fat la carjéra ch’ l’ à fat, parchè al né fa miga do partidi béli a drè fila gnanca a morir, tutt chi….dailà balarén, a tajär dil torti al fésti di club a sé gh’ pensrà cuand a sèmma sälv, prìmma pensèmma a casär déntr’al balón valà
Okaka : sarìss stè méj ch’ al fuss somiljè a n’incróz tra Pelè e Asprilla, invéci al somilja a un incróz tra Eddy Murphy e al Trota, cioè du che col balón i ’n gh’ àn njént a che fär, e purtrop a s’ vädda anca
Donadón cuàtor : Oh Mìsster mo che storja éla còssta chi ? Marino al lasè un virus in-t-al so camarén ch’ al vé taca tutt ? No parchè anca lu al n’à cambjè gnanca un zugadór da domenica pasäda, có él cól lavor chi ?? E par piazér un pò pu äd grénta, che l’educasjón e l’elegansa i s’ piäzon bombén a Pärma, mo anca un pò äd grénta al momént giusst la vól tiräda fóra ah !
Arbitri zéro : elora i cäz j én du ! O l’é in mäla féda, o l’é vón ch’ al gh’ à di gros probléma ala vìssta e ala tésta, mo in tutt du i cäz al vól licensjè subìt parchè al né mìga in gräd äd fär al so lavor ! Ecco indó al vól tirè via l’artìccol dezdòt cära la me Fornero, cminsämma da ch’ la categorja chi invéci che cój lavoratór a mìlla evro al méz ! E son curjóz äd sintìr có s’inventaràn chi patétich avocät dil càvzi pärsi ch’ a gira p’r il trasmisjón, sénsa fär nom ! AVANTI CROCIATI
(Tgnèmmos vìsst)
(Testo di Crociato 63)
(Correzzione ortografica a cura di Enrico Maletti)
Post
Nessun commento:
Posta un commento