(TESTO IN DIALETTO PARMIGIANO)
Ribelle
- Pärma 0-1
Zommers
déz : masim di vot par Tin Tin anca s' al gh' à pù lavor un
portér da condomìnni che lù ; però a gh’é rivè un tir nojóz
e do usìdi e l’à dimostrè d’ ésor sémpor pront e concentrè,
còza rära p'r un ragas äd dezdòt an' !
Mesén'na
òt : tutt chi ragasén chì j’én carsù a bistècchi äd león :
i päron fat cóll stampén, ält, spali lärghi, mo cóll ch' a fa
restär a bòcca avèrta, l’é chi gh' àn si e no l’etè
par la paténta e i dimòsstron 'na maturitè e 'na cälma da génta
a fén ädla carjéra
Caciól
déz : oh Capitàn, la prìmma volta la ’n sé scorda mäj ahn ?
specialmént sa riva 'na vitòrja ch’
la väl òr : però prìmma o po’ at' gh' arè da spiegär cme mäj
t’é pasè tùtta la carjéra in sèrja
D, parchè mi a gh' l’ò ancòrra da capir.
Giorgén
déz : centräl äd centorcàmp, centräl ädla diféza, al rendimént
al né cambja mìga : al top! Vrà dir
che Gigi s’al sé dovìss catär in dificoltè al té podrà fär
fär anca al centravanti ch' a té t' la zbrigarè ala granda anca
li, no ?
Saporètt
déz : al ragas ädla tèrsa C al fa 'na zugäda da rapinatór
d’area ala Inzaghi e al porta a ca' tri pónt, mo a pärta al gol,
al zuga 'na partìda äd gran sostansa, zéro erór e concentrasjón
al masim; n’ ätor ezémpi äd la béla gioventù crozäda e dal
gran lavór che Gigi l’é 'drè fär con tutt lór
Corapi
déz : partìda da Méstor, un diretór d’orchéstra parfét, t’é
deciz ti cuand l’éra al momént d’acelerär e cuand invéci
sarvìva tirär al freno e ciapär fjè ; 'na còza sola però, al me
amigh Alberto al s’é lamentè parchè at' gh' é tirè la majètta
tùtta sporca e ch’ l'à scampanäva un po’ sòtta il lazén’ni,
la prosima volta sta un po’ aténti a cascär e sudär meno vala
bén ?
MIliètta
séz : sibén che il do zugädi tecnicamént pù béli ädla partìda
i sìon städi tòvvi ( al tir al vol dal prìmm témp e al colp äd
tach zmarcant dal second ) a ’n t’é mìga ancòrra capì che la
sèrja D pù che cantär lé cuäzi escluzivamént portär la cróza,
e si che con cóll nòmm chi a t’al dovrìss savér méj che ch’j
ätor no ?
Melandri
séz : un po’ fiach al Micio jerdlà, un gat pùff sénsa mäj 'na
zugäda dil sòvvi, e la gh' pól stär parchè fin adésa l’éra
stè fòrsi al pù regolär e brilant äd tutt
Lauria
òt : zugadór delisjóz, sinìsstor rafinè, movimént da balarén,
at' m’arcord con tutt al rispét un po’ Messi, mo purtrop fin
adésa al momént bón a t’é sémpor restè al colp in càna o
cuäzi, sperèmma ch' at' pos schisär al grilètt in-t-al momént
giusst anca ti
Sereni
séz : un vót äd stimma parchè jerdlà sa t' fùss stè a scóla i
profesór i t’arìsson sgnè asént insìmma al regìsstor, poch
ispirè e poch in sintonia cójj schéma ädla scuädra anca s' l'é
véra ch'a t’é zughè poch e po’ al camp al té pól avér
limitè pù che tant ätor
Guas
séz : anca ti at' si restè con al colp
in càna però la sensasjón l’é che al post giusst at' si bón äd
färot catär dato ch' at' si sémpor zmarchè; l’é manchè cóll
cicinén äd precizjón e fòrsi anca äd c.. , fortón’na ch' j’én
li dardè l’angol, dai tén dur ch' a riva al tò momént anca par
ti sta trancuil
Apolón
òt : Gigi, a caval donè “ecetera ecetera”, prìmma fuga e
adésa tén schisè l’aceleratór ch' l’é al momént d’andär
via e n’artornär pù indrè; però jerdlà fòrsi pròprja a vrér
sarcär al pél in-t-l’óv l’é städa a rizgh
un po’ trop, fòrsi j’én stè cambiè un pär äd zugadór äd
trop tutt in-t-na volta e i schéma i n’àn risentì, mo Gigi, l’é
pròprja al pél in-t-l’óv, avanti acsì ch'at' si 'drè fär un
lavór pù che parfét
Tifóz
e Socetè déz : fin adésa tutt parfét e tutt belìssim, a sèmma
'drè dimosträr a tùtta Itàlja e anca a tutt al mond am' vén da
dir có vól dir ésor pramzàn e có vól dir amor par la pròprja
citè, la pròprja màja e la pròprja storia, ch' a sia Sèrja A ch'
a sia sèrja D, Wembley o Cervia, còssta l’é la scuädra ädla
vìtta mia
CARICA
CROCIATI
(Tgnèmmos vìsst)
(Testo di Crociato 63)
(Correzione ortografica a cura di Enrico Maletti)
Post
Nessun commento:
Posta un commento