(TESTO IN DIALETTO PARMIGIANO)
Clodiense
Pärma 0-3
Fall
sénsa vót : parténsa da INPS anca par ti, ossia ch' at' pol andär
a fär dmanda par la dizocupasjón, e magna un po’ äd caval pìsst
l'omén, ch' at' pär Kiriku, col cartón animè Africàn p'r i
putén, trop mägor dailà
Adorni
nóv : a l’artorn’a dir tutt il volti, chi a gh’ é dal bón
da lavorär : sa pensèmma ch’al gh' à darsètt an' si e no, in
prospetìva cóll ragas chì l’artórna in sèrja A con nojätor e
con la so maja, vrèmma scomèttor ?
Caciól
déz : pasäda la sindrome di pimm vint minùd, parfét cme al solit
anca se jerdlà l’é stè pòch äd pù che n’alenamént; mi
conòss poch la categorìa, second mi i fat pù fadiga a Flén
giovedi ?
Lucaréli
déz : parfét, la ciòsa parféta par 'na scuädra che fin adésa la
pär un mix parfét tra giòvvon con talént e inteligénsa e madur
con äd l’esperjénsa : e cóll gol li Capitàn ? nojätor
continuèmma a pasturär che at' vedrè ch’al riva al momént
giusst e mi l’idea äd col momént lì a gh' l’ò béle in-t-la
tésta
Saporètt
òt : al s' vèdda pòch, se mìga par ch’ la ténta äd cavji da
Bociofila dal Castlètt, però ala fén al dà l’idea d’ésor col
tipo äd zugadór ch’al parmètta äd cambjär schema in corsa a
tùtta la diféza e äd conseguénsa a tùtta la scuädra
Ricci
déz : n’ätor che in sèrja D al gh’éntra poch mo poch bombén;
in diféza, davanti, indó t’al mètt al zuga e al zuga da grand
zugadór e po’ cóll sinìsstor delicät e precìz che dòpa al gol
con l’Altovicentino l’à regalè n’assist a Corapi ch’al
paräva Casàn; técnica, fizich e maruga a pär ch’ i gh' sìon
tut !
Corapi
déz : ch' l’avìss ciapè l’andiamo giusst al s’éra béle
vìsst con la Coregèz, e jerdlà, gol a pärta l’à zughè 'na
partìda sontuóza, pront p'r al trìttich äd partidi ch’ al pól
béle där un colp decizìv a l’anäda
Giorgén
déz : Cucù semplicemént parfét : mi a dìgh, e son sincér, che
l’an' pasè al post äd Lucas Souza e Jorquera j’avìsson tòt
Corapi e Giorgén, la sarìss städa la stésa còza, ansi chi du chi
j’én pù bón, però as' sà, andär a tór di zugadór in D o in
Lega Pro a ’n gh’é njénta da rozgär elóra nisba
Miliètta
sètt : dai vè Crocifìss, con col nòm li con la crozäda adòs at'
si béle in famija nò ? un po’ äd gamba in pù e vón cme ti chi
csì al fa gnir nùvvol ; dai che adésa a cmìnsa al bél e agh' n’é
par tutt
Lauria
òt : sinìsstor d’or, e tanta inteligénsa tatica al sarvìssi dal
centorcàmp e a l’atàch, in parféta sintonia con i dù Toscanén
dardè e i solissta davanti : la tèrsa äd cuàtor vèrtebri dal
filón ädla schén'na äd categoria suparjóra
Longobärd
déz : a mi chi zugadór chi, dala sèrja A a j’amatór CSI im'
fan stravèddor : rivè chi cóll curriculum dal bòmber, al s’é
miss al sarvìssi ädla scuädra con 'na vója äd lotär ecesjonäla
; un centratàch ch’al còrra cme un medjàn, e pòch importa s’al
fa gol o no, l’é sémp'r al prìmm a festegiär con un sorìz ch’
al fa lùza a sincuanta chilometri äd distansa, tant par dir ch’j
al vèddon tutt il fésti anca a Rèzz e i brùzon cme i falò
Baraye
déz : abitvè cme sèmma al bròd äd capón bél gras, jerdlà a ’n
t’é mìga fat vùnna dil partìdi pù béli, però al déz l’é
p'r al gol, sarchè e catè in-t-al momént giùsst, cóll ch' a
sarviva par sarär su la partìda dòpa un témp, e fär in manéra
äd risparmiär cuaranta minud äd fòrsi a tutt, che col calendäri
dil pròsimi do stmàni l’é gras ch' a cola ! Tecnicamént a pòs
vansär äd ripetor tutt il fésti la solita fòla, a n’ò vìsst
di meno fort che lù in sèrja A, s’al s' mètta in tésta äd
zugär con umiltè Tino picè al gh' à 'na carjéra davanti
Apolón
déz : Gigi, có dir se mìga avanti acsì ??? p'r adésa tutt
parfét, parchè l’é véra ch' at' gh’é 'na Formula uno in
màn, mo l’é anca véra che in sèrja D al Pärma al gh' à da
vénsor e basta e – as' sa – vénsor a n’é mäj acsì scontè
! e a vèddor anca da l’umor di ragas, second mi a si 'drè
divertir un bel po’, e nojätor anca ; e adésa tésta bàsa ch' a
gh’é do stmani chi podrìsson béle ésor decizìvi par la stagjón
CARICA
CROCIATI
Tgnèmmos
vìsst
(Testo
di Crociato 63)
(Correzione
ortografica a cura di Enrico Maletti)
Post
Nessun commento:
Posta un commento