"Il Pagéli di Crozè in djalètt Pramzàn", Bològgna Pärma 1-1. Testo pubblicato sulla Gazzetta di Parma del 15 aprile 2014

 

(Testo in dialetto parmigiano) 

Bològgna Pärma 1-1

Mirànt sètt : in-t-al finäl cuand é saltè tutt i schéma, t’é salvè baraca e buratén con un pär äd parädi mìga tròpi còmdi ! e in bòcca al lòvv par la Nasjonäla, second mi té t’ la mérit tùtta st’ an’

Casàni séz : un séz rozghè ! col Morleo lì l’éra pròprja un brut càncor, un gol salvè insìmma ala riga e p’r al rést freno a man tirè e pòch ätor

 

Lucaréli séz : n’ätor cartlén e n’ätra scualifica, purtrop al mestér dal centräl l’é anca còsste chi, Calimero cuand l’é andè via a s’ vèdda ch’ al t’à lasè ch’ l’ereditè chi, e purtrop a t’ tòcca saltär n’ätra partìda fondamentäla

Palètta sìncov : eh Paletón stavolta al gh’ é scapa al sìncov, dailà a t’ gh’é piantè ‘na marcadura da amator, sperèmma che al raduno ädla nasjonäla al t’ pòsa cargär un po’ il pìlli parchè l’é un mezètt ch’ a t’ si un po’ in riserva

Molinär séz : che pagéli ch’ am’ tòcca fär incó, partìda piàta cme ‘na cansón äd Pupo, scontäda cme un film äd Pieraccioni, nojóza cme ‘na trazmisjón äd Fazio, e anca Molinär sinceramént l’à fat ‘na partìda che a né s’ sa gnan s’ al gh’éra in camp o meno !

Marchionni séz : e anca Marchino gnanca ‘na còza ch’ a m’arcord, un pasag’,  un tir, un contrast, gnanca n’erór tant par dir; oh vè che sabot cambia la muzica vè ?

Acquah sètt : sicuramént al pù brilant, l’à cantè e portè la cróza, cors lotè contrastè, insòmma sémp’r äd pù fondamentäl li in méza

 

Gargàn séz : topo gigio s’é vìsst ch’al ritornäva dòpa un bél po’ äd témp ! dai cèlera che anca par ti sàbot ch’ vén sarà ‘na partìda un po’ speciäla

 

Schelòt sìncov : la prìmma partìda zbaljäda cuäzi completamént, anca fóra pozisjón second mi, cors l’à cors mo a vód tùtta la partìda, dai eh lòmmo che adésa a s’ diz dabón

 

Biabiany òt : séns’ätor al pù pozitìv ädla scuädra, corsa cross assist e anca – e l’é un po’ ch’al son adrè dir, inteligénsa tatica che partìda dòpa partìda la crèssa semp’r äd pù

 

Palladén séz : gran bél gol, mo p’r al rést la solita partìda da badàc’, un sach äd bali pèrsi, e ’n capir mìga che cuand a gh’é da bocär balón e garlètt, i ghirigori i vólon lasè ai balarén mìga ai zugadór äd balón

 

Donadón séz : Mìsster a vój tant che col ch’ a són adrè  scrìvvor la sia ‘na stupidäda gròsa cme ‘na ca’, mo a m’é d’aviz che al momént ch’ a gh’ vräva il batarìj al masim ädla poténsa, invéci a gh’ sia parèc’ zugadór scàrogh, col gambi mòli e la tésta vóda, mo fòrsi l’Inter, cme l’é stè p’r al Napoli la riva al momént giùsst parchè in ch’ il partìdi chi a s’ cata fòrsa concentrasjón e grénta ! AVANTI CROCIATI

(Tgnèmmos vìsst)

(Testo di Crociato 63)

(Correzione ortografica a cura di Enrico Maletti)