"Il Pagéli 'd l' an' di Crozè in djalètt Pramzàn". Testo pubblicato sulla Gazzetta di Parma del 21 maggio 2014

 

Testo in dialetto parmigiano

Pavarén déz : Cminsèmma da Pavarén, fin in ùltom gran profesjonìssta e fondamentäl in chi an’ chì e pù che ätor a znär par tgnìr trancuill l’ambjént in-t-un momént un po’ particolär, a m’ in dispiäz ch’ l’ a sia l’ùltma volta ch’a t’ fagh la pagéla, e có dir un ragas cme tì ? trèj  paroli chi välon cme un poema : GRASJA ÄD TUTT

 

Mirànt òt : ‘na cuälca incertèssa in fónda ( e ‘na cuälca incertèssa la gh’ l’à  avùda anca al so barbér  socuànt volti ) mo p’r alméno séz méz al pù fort portér dal campionät ch’ l’arìss meritè d’andär in Brazil;  a s’ é vdèmma sòtta  ala Nord tra un pär äd méz l’òmmo

Bajza séz  : ‘na partìda discréta in campjonät  e vùnna impresionànta in Còppa Itàlja a Ròmma ! va bén a t’ si giòvvon, tutt pardonè, mo sérca äd dormir atàca a di pòmm ch’ a t’ madurìss pù ala zvèlta

Casàni déz : parténsa  col freno a man tirè, mo da novémbor inàns un tarsén ecesjonäl, inteligént e bón sia davanti che dardè, e dòpa n’ an’ acsì vèddor che ai mondjäl  a gh’ va  Abate e Maggio l’é ‘na còza ch’ la n’ sta né in cél né in téra

Rosi òt : la pòsja dir tùtta ? mi spér ala fén äd lùjj ch’ al pòsa tornär indrè dal Sasól, parchè l’é un zugadór ch’ a m’ piäz bombén e anca un ragas ch’ l’äva dimostrè äd savér onorär la maja e ch’ l’é anca bón; cme a m’é dispiazù ch’ al sia partì, sarìss contént  s’ l’ artornìss indrè

Mendes sètt : il pòchi partìdi ch’ l’à fat al n’à mìga sfigurè brìza, l’éra  ‘drè  crèssor partìda dòpa partìda e fòrsi l’é  stè giùsst mandärl’a zugär un po’ äd pù, con dispiazér äd la so petnadóra dato che tutt i dì al s’ prezentäva con dil petnadùri nóvi e mäj vìssti

Felipe séz : vè Felipe, se jerdlà Cerci l’avìss casè déntor al rigor col séz chi a l’arìss tajè in dù e al sarìss dvintè un bel trì sèch : mo dato ch’ a sèmma tutt in fésta a s’arcordèmma dil còzi béli e basta cme ch’ il socuànt partìdi ch’ a t’é fat prìmma äd  “l’embolo” äd Cagliari; dai acua pasäda e andèmma su par ch’ l’ätra

Lucaréli déz e lode : zugär a trentaséz an’ al pù bél campionät  ädla cariéra vól dir ésor un profesionìssta ezemplär oltra che a un gran zugadór ! al centräl pù fort dal campionät  sénsa sé e sénsa ma, un Capitàn déntor e fóra dal camp, un crozè e un pramzàn onoräri e mi són orgoljóz d’avér la so màja. Pisaròt prepära ‘na ciäva ädla citè che Ale a s’ la merita tùtta. Ale m’arcmand, sta mìga gnan’  pensär d’andär via, parchè a t’ vén a ligär mi al colón’ni dal Tardini ( e insèmma a Lucaréli a gh’ metèmma anca Morón, che al sò che Stefano a ‘t zugh ancòrra con la crozäda sòtta ala maja dal Latina al post ädla canotéra e incó  a t’ si contént tant cme nojätor e il mé pagéli  i t’ rivon sémpor e a t’ j’ a god da mat. Stefano l’é anca tòvva ch’ l’ Europa chi, e in bòcca al lòv che magàra a s’ catèmma st’ an’ ch’ vén )

Palètta òt : oh Paletón ‘na cuälca zbandäda a t’ l’é fata chi in fónda, però a ’n vój mìga  scordär  tutt il partìdi strepitózi ch’ a t’è  zughè e la tò gentilèssa anca fóra dal camp cuand a t’ sèmma gnù a catär col me amìgh  Riko, e dzèmma ch’ a t’èmma anca portè fortón’na, dai e in bòcca al lòv p’r al Brazìl, ch’ a té t’ farè onor sicur

Molinär déz : raport cualitè/prési al màsim posìbbil dato ch’ l’é costè zéro e l’à fat un grandìssim finäl äd campionät, con un pär äd gol e un rendimént sémp’r altìssim, afidàbil cme un diesel todèssch, inteligént e modést, Pédor… in Francia i dìzon “ca va sans dir”, a Pärma pù o méno a s’ diz compàgn : confermè !

Schelòt òt : Galgo o cunjì, pù che ätor a t’ gh’é la corsa d’un cavarjól e la grénta d’un can da càsa; dòpa déz minud ch’ a t’ si rivè a paräva ch’ a stìss a Pärma da déz an’, a t’ si entrè sùbbit in sintonia coj compagn, l’alenadór la socetè e i tifóz, e in camp a s’é vìsst e come, gol, corsa e prìmma ancòrra sudór, ch’ l’é còll ch’ a vrèmma

Gobbi òt : Massimo fòrsi al prìmm contént  cuand l’é rivè Molinär a t’ si stè ti, acsì té t’ si podù arpozärt un po’ dòpa tri campionät  tirè bombén e zughè ala granda; e cuand a gh’ é stè bizòggn cme jerdlà  sìra a t’é fat anca al centräl ! zugadór “a l’antìga”, pochi bali e tanta lèggna ! ezemplär !

Biabiany òt : Guidolin prìmma e Donadón adésa, du gran Mìsster chi t’àn ciapè par man e un pas ala volta a t’ si dvintè un zugadór äd balón e mìga pù vón da maratón’na; séz gol, in parècci partìdi zugädi decizìvi e anca un grand spirit äd sacrifìssi in diféza ; oh po’, bjónd a ’n’ é s’ pól miga vèddrot mo còll  li a gh’ pensarà la tò moróza nojätor do ori ala stmana rezistèmma anca basta ch’ a t’ contìnnov a zugär acsì

Marchionni òt : grande Marchino, n’ätra scomìssa vénsa prìmma da Pédor e po’ da Donadón, socuànt  pociädi  in-t-la pisìna äd Cocón, fosforo e maruga a bìllich li in méza, diretór d’orchéstra in pónta äd fiorètt e anca ‘na cuälca sacagnäda bén däda cuand a n’é stè ora ! con du centorcampìssta  d’atorna con ‘dla gamba second  mi a t’ pól fär n’ätor du an’ ancòrra a chi livél chì

Gargàn sètt : topo gigio al gh à dil potensjalitè spaventozi, però al s’ fa mäl un po’ trop dé spès e cuand al zuga d’ogni tant al s’ pjäz un po’ trop e al fa dil  c**ädi, però mi vón ch’ a còrra cme lù a l’ò vìsst raramént, e cuand al dìz dabón e al pasa la bala al so compagn pù azvèn sénsa pensär d’ ésor Maradona, l’é un mediàn cme poch, ansi pochìssim 

Paról déz : ot gol pezànt bombén, corsa straordinäria, taticamént ecesjonäl, ragas educhè, modést, sémpor soridént e inteligént : a gh’ manca cuél ?? dirìs äd no ! col Capitàn a t’ si stè al crozè col rendimént pù ält st’ an’,  adésa a t’ vè strameritatamént in Brazìl, in bòcca al lòv anca a ti Marco, e la mé speransa l’é ch’a t’ pòsa vèddor ancòrra con la crozäda adòs ala fén äd lùjj !

Obi séz : sarìss un sénsa vót, l’à zughè sìnch  minud in cróza, tutt da vèddor, sperèmma prìmma  äd tutt ch’a s’ pòsa romp’r un po’ méno déd chi inàns

Munäri sètt : Oh Gianón té t’ si magnè du gol a Ròmma e col Genoa chi sarìsson podù costär carìssim, però a t’ gh’é la ghìggna simpatica e té m’ dè l’idea d’ésor un gran bräv ragas e vón ch’ al pól gnir  bón in parècc’ momént äd la partìda dónca Gianón mi a gh’ scometrìss che st’ an’ ch’ vén a t’ pòs fär molt méj

Acquah déz : a m’ l’arcord  l’an’ pasè prìmma d’andär via ch’ al n’éra gnanca bón äd stopär la bala, adésa  l’à imparè i témp äd zógh, tecnicamént  al né pär gnanca pù lù tant l’é miliorè, e po’ un fìzich ch’ al pól vìvor  äd prepoténsa lì in méza e cme difati l’é un divertimént vèddor ch’ a n’ n’in strabùcca du o trì  tutt il partìdi; anca chi Pédor dato ch’ a gh’é al dirìtt äd riscàt,  m’arcmànd,  portär’l a ca’ ‘na volta par tùtti  e anca ala zveltén’na

Palladén séz : fèmma fénta ch’ a ’n sia sucés njénta, ch’il do coj***di ch’a t’é combinè st’ an’  j’ a mandèmma sòtta  l’ùss e fèmma fésta dato ch’ a s’é vìsst domenica ch’ a t’ s’ér contentìssim cme tutt e  m’arcmànd, a t’ dovrìss stär ancòrra a Pärma, un brìzinén pù äd grénta e vója äd bocär la bala, che po’ cme técnica  a  né t’ gh’é da imparär njénta da nisón

Cerri déz : metèmma il man avanti e a gh’ dèmma col vót chi in prospetìva e par còll ch’ l’à fat cól giovanili l’an’ pasè e st’ an’ : però sémp’r a propòzit dil tozädi, mo col ciùff lì chi é ch’a  t’al fa ?? mo gh’ iv tutt al stés barbér ???

Sansón séz : n’ätor che s’ l’artornìss indrè sùbbit a ’n cridarìss mìga : e dir che anca a Sasól l’à rissgè äd zugär mìga e cme difati al gènio veronéz l’à fat a päri col record äd Pasaréla, sìnch  partìdi zéro pónt; a tutt il manéri  dato che con l’Europa sarvirà socuànt zugadór in pù, chilù al podrìss artornär indrè sùbbit, dato ch’ al conosèmma e second mi l’é bón, mo bón bombén 

Galòpa déz : sa tè gh’ la cavìss andär a päri con la sfortón’na da adésa ala fén ädla cariéra a né t’ dovrìss ciapär gnanca pù un fardór; a tutt il manéri t’al sé che a Pärma ormäj a t’ vrèmma bén tùtt parchè a né t’ mòl mäj e rivarà bén al momént anca par tì äd cavärot il sodisfasjón ch’ a té t’ meritarìss tùtti

Amauri déz : al Re Leone, con un po’ äd crinéra bjanca, al da ‘na cuälca bocäda äd meno, mo cuand al  bòcca j’én bocädi chi läson al sìggn: a son contentìssim parchè al n’ à mäj molè, cuand al zuga al gh’ é mètta sémp’r al sentvìnt par sént e al dimòsstra d’avér la crozäda in-t-al cór, tri an’ fa al s’à salvè, e domenica al s’à regalè l’Europa… confermè anca lu !

Casàn déz : Fantantonio, e dir che a Pärma dal 1990 inàns äd bón a n’èmma vìsst pasär a sentonär, mo un géni acsì a ’n l’äva mäj vìsst ! al gh’à la capacitè d’ésor bél anca cuand al zbalja la zugäda, e st’ an’ a s’é vìsst di pasag’, di  colp, di nùmmor che nojätor pòvor mortäl a ’n s’éron  gnan d’avìs chi podìsson ezìsstor ! Inùttil girärgh atorna l’é stè decizìv anca par la convinsjón ch’ l’à trasmìss a tutt i so compagn, e anca cuand al s’à fat rabìr un po’ tutt a znär, mo l’à dè la scòsa decizìva a l’ambiént, in pozitìv, e giustamént l’é  stè premiè col Mondjäl ! che spetacol ragas che lavor !!!!

Donadón déz e lode : e cme sémpor Mìsster pochi, paroli : gràsja  äd tutt, ädla profesjonalitè, l’educasjón, la serietè, la competénsa, l’ imàgina ch’ l’à trazmìss äd Pärma in tutt Itàlja e in tutt al mond; sinceramént, con tutt i pajas e i saltimbanch ch’ a gira in-t-al mond dal calcio, avér un Sjòr con la S majùsscola col sìmmbol  äd la mé scuädra e la mé citè insìmma al taschén dal zachètt al mé fa ésor ancòrra pù orgoljóz ! GRAZIE GRAZIE E ANCORRA GRAZIE e a fagh sénsa dir ch’ a spér che st’ an’  ch’ vén al sia ancòrra l’alenadór ädla mé scuädra

Boys e tifóz : Tardini e curva anni 90 jerdlà  sira, tifo bojént e la sensasjón ch’ a sia cminsè al rimbäls dòpa avér tochè al fond j’ultom du o tri an’; la scuädra ch’ a tira al pùbblich  e al pùbblich ch’ a tira la scuädra, e via ch’ a s’ torna a girär par l’Europa con la speransa ch’ al pòsa ésor un gir lóngh, al pù lóngh posìbbil 

Ghirärdi e Leonärdi déz : oh Diretór stavolta a gh’ la fagh  la pagéla ahn ! parchè Bibì e Bibò j’ àn fat un méz caplavór ( ansi tri cuärt pù che méz ) e adésa ch’ j én entrè in pjén’na sintonia con la citè e i pramzàn i risultät  i s’én vìsst sùbbit : bravìssim a tutt dù e bravìssim  a tutt còj ch’ a lavora in Socetè, ‘na volta a se dzäva par rìddor, adésa al digh e tutt i tifóz j’al dìzon dabón : GRAZIE GHIRO E GRAZIE PIETRO E AVANTI CROCIATI,  a s’ catèmma fra tri méz, bón’ni vacansi  a tutt !!

Tgnèmmos vìsst

Testo di Crociato 63

Correzione ortografica a cura di Enrico Maletti