Il Pagéli di Crozè in djalètt Pramzàn, testo pubblicato sulla "Gazzetta di Parma" del 18 aprile 2011

(Testo solo in dialetto Parmigiano)

Pärma Inter 2-0

Mirànt òt : con la majètta color steward a ’n t’è fat pasär nisón, corag’ e concentrasjón, al Mirante äd l’an pasè se Dio vól

Zacärd òt : anca par Miclón ‘na partìda ecesjonäla, diagonäli parféti, esparjénsa al sarvìssi äd la causa e ‘na gran corsa, anca lu trasformè da j’ultom méz

Palètta òt : e Shining l’é artornè a fär paura a j’avarsäri, òcio lòmo che sàbot ch’ vén a t’ gh’arè contra du chì päron bip-bip, e ti a né t’ gh’arè miga da fär cme Will al coyote

Lucaréli òt : có ät tòt dal magnesio, t’è magnè tutt al caval pìsst äd l’Olga ch’ a t’ paräv gnanca còl ch’ à zughè col Bäri e con la Lasjo ? Gran partìda tùtta grénta e cór

Gobbi séz : tarsén con un compagn davanti, la ricéta par färol artornär a ésor un zugadór da fòttbal, adiritùra con ‘na zugäda ala Ronaldinho cuand l’à lancè Modést par l’asjón dal second gol

Candréva zéro : vè bräga bojùda, tàca béle a fär il valìzi che äd fenomeno cme ti a’n sämma miga äd có färsni a Pärma, e a ’m férmi chi parchè d’ésor trop péz a né gh’ n’ò miga vója stavolta

Valjàn déz : al cambi ch’ l’à sarè la partìda, entrè al post giùsst al momént giùsst la so corsa l’à dè al KO a l’Inter, e la so umiltè l’ à dovrìss avér insgnè cuél a Candréva, la dovrìss

Morón séz : Capitàn dil vòlti a t’ pär un film in bianch e nìgor con ch’ il do gambètti da sènnor lì ch’ a t’ fè andär cme dil tròtoli, prìmm témp da incubo, second témp invéci äd gran sostansa e concretèssa ! Però ‘na còza, làssa lì con tùtti ch’il comédi lì ogni vòlta ch’a t’ ciap ‘na zbaräda o ‘na balonäda, parchè a nojätor i né s’ piäzon miga

Dzemaili séz : cme al Capitàn stés andiamo, prìmm témp da Profondo Rosso e second témp pu che discrét, con ‘na gran corsa in-t-al finäl sémpor pront a där l’òmm in pu ai contropè, la seconda partìda bón’na äd l’an dòpa còlla äd Torén

Modést déz : a s’ vädda che cuand a j’ò ditt ch’ l’é méj Pavlén a s’ l’é tòta a mäl, fatto sta che scurtärogh la zona äd competénsa a gh’ fa bén, du assist in-t-i du gol, e ‘na corsa impresjonanta fin in fónda

Giovinco déz : second mi la pu béla partìda äd l’an’, oltre al gol, corsa e sacrifìssi al sarvìssi äd la scuädra, al pòvor Ranocchia l’à fat pu ädna volta la figura dal nàdor pu che ädla rana

Amauri déz : che blèssa väddor un león con tant äd criniera lotär dent’r a ‘na màja crozäda! Cuand l’é acsì motivè l’é un gran brutt càncor par tùtti, e ‘na gioia p’r i so tifóz (Partegiànt) ! Vót un consìli lòmo ? Pärma l’é la citè ideäla par ti, a 30 an’ sta miga andär a sarcär dal frèd p’r al lét da n’ätra pärta !

Colomba déz : l’é bastè butär via al champagne e sturär na botilia d’umiltè, 4-4-2 da scóla calcio, fär spudär j’ultmi energij a l’Inter in-t-al prìmm témp, cambi parfèt al momént giùsst e’ na béla dimostrasjón äd caràtor al putén visjè e permalóz, dòpa vùnndoz méz finalmént a j’ò rivìsst n’alenadór insìmma a la banchén’na dal Pärma, e n’é miga pòch! Di vè, e la soprèza in-t l’óv ( o anca in-t-la colomba ) a gh’ la fämma al Don sàbot ch’ vén ?

(Pramzàn dal sas)

(Tgnèmmos vìsst)

(Testo di Crociato 63)(Correzione ortografica a cura di Enrico Maletti)