Déz an' insèmma a Maringela e al còro “Cuator Stagjón” Testo pubblicato sulla Gazzetta di Parma del 1 luglio 2016 nella rubrica "Tgnèmmos vìsst"

(TESTO IN DIALETTO PARMIGIANO)

Al còro femminìl «Cuator Stagjón», al fa pärta 'd l’asociasjón “Còri parméns” e dal “Club Parma muzicale” e al tóz al nòmm dal cant popolär ch' l' arcòrda, con paroli e muzica, il divèrsi stagjón ädla vìtta.

Al còro “ Cuator Stagjón” al nàsa in-t-i ani ’80 da l’idea d' un grùpp d' amìghi, p'r arcordär il cansón ädla nòstra tradisjón. Mo al còro (tutt feminìl) al vèdda pò la sò carsimònia (crescita) artìsstica con la diresjón äd Mariangela Bazoni, déz an' fa, ch' al mètta in armonìa a tre vózi i tést e al zlärga al repertòri: al sàcor, ala cansón napoletana e d' ätri regjón italjàni, ai cant popolär Africàn, andànd fóra dai confén citadén. E acsì al s' vèdda impegnè a Worms, in Germania, p'r al gemelàg' con la citè äd Pärma e a Nizza al Consolät. Mo l'é pu che ätor sul nòstor teritòri che al còro l'é pù prezént, in tanti ocazjón par benficénsa: ricòvor, concèrt ala Vilètta, Avis-Hospice Piccole Figlie, Auditorium del Carmine, concèrt ala céza 'd S.Iläri, Ca' 'dla Muzica, Festival ädj Orsant a Borgtär, Corale Verdi, ecc., insòmma in tutt i pòst indó as' pòsa tgnìr viva con alegrìa la nòstra tradisjón cantarén'na. Par còsst che al méstor Mariangela Bazoni l' à muzichè divèrs di nòstor poéta dialetäl. Cuäzi sémpor l’esecusjón di cànt l'é precedùda da dìll notìssi storich' (frut äd ricérchi dìll corìssti); e in-t-i intarvàl di concért as' vèdda impegnè dìll corìssti-atrìci in-t-la letùra äd poezjj in dialètt Pramzàn e in lénngua. Un còro dónca a 360 gräd, indó as' divartìssa intànt ch' as' fa cultura. In chi gióron chì al còro l'à festegè i déz an' ädla diresjón äd Mariangela Bazoni, con un dopmezdì ala Corale Verdi, contornè da ospit ch' j àn colaborè in tutt ch'j ani chì con Mariangla e il so amìghi. J àn partecipè al dopmezdì: Corrado Medioli, Enrico Maletti, Maurizio Trapelli (Dsèvod), William Tedeschi, Paolo Briganti, Ursula Mezzadri, Raffaele Rinaldi, Ermes Ghirardi, Claudio Morini, Violetta Krachmarova, Daniele Leporati. Avguri a Mariangela e a tùtti il componénti dal còro. E adésa as' volta su par n' ätor déz an'.

Tgnèmmos vìsst