(TESTO IN DIALETTO PARMIGIANO)
Bellaria - Pärma: 1-5
Zommers
séz : 'na curiozitè, mo ti sit col Kripstak äd Zelig e la tò
moróza la s' ciama Petrektek ? certo che pù che di nòmm i päron
un lampadäri e 'na cardénsa äd l’Ikea ( a se schèrsa parchè a
né s' sa mìga mäj có dir ädla partìda mäj un tir e cuand i
t’al fan l’é a l’incróz di päl )
Mesén'na
sètt : sìnch mèttor avanti ogni partìda e ormäj at' si dvintè
n’ äla pù che un tarsén, e purtrop in cóll momént chi a ’n
gh’ èmma gnanca un centratàch d’area, parchè at' mètt in méza
di cross piturè ( purtrop as' fa par dir, al pù bón atàch e du
gol e méz a partìda äd médja )
Caciól
òt : fin ch' a gh’é da dir dabón concentrè al sént par sént
dardè e davanti, con n’ ät'r assist anca jerdlà, e po’ cóll
méz mèttor lasè a l’atacant che po’ l’inventa un gol dala
Madònna un po’ cme con al Ravenna, mo a tutt il manéri la va bén
bombén, se la dormida la riva sul cuat'r a zéro, a vój ch' a té
t' pòs arpozär tutt il fésti
Lucaréli
òt : oh Capitàn e cóll gol li cuand al fèmma ? ormäj at' si
dvintè pù ritardatäri che al 34 su Cagliari, l’ à sgnè fin
Apolón at' manchi ti e basta (al so ch' at' si pù marchè ti che il
pónti, al so)
Saporètt
òt : eh che gol ch' at' si andè a strolgär, a né t' sé gnan ti
cme t'é t' si ravojè p'r aria, t’é fat un vèrs da gat, mo
l’important l’é ch' a t’è sarè su la partìda ala zvèlta
acsì da podér tirär un po’ al fjè
Simonètt
òt : nisón a s’ n'é acort ch' a mancäva Giorgén lì in méza ;
e con còsste chi a j’ò béle ditt tutt ! partìda zugäda con
grand sicurèssa e avtoritè, a dezdòt an' e soltant la tèrsa
partìda l’é 'na gran còza ! BRAVO !
Miliètta
déz : a Barsél al m’äva impresionè da mat, jerdlà la conferma,
cuand al sta bén l’é äd do categorjj pù su, bala sémpor par
téra, prìmm control sémpor parfét, geometrjj tirädi con la
scuädra, témp äd zógh al milézim äd second ! un ufo par la
categoria
Lauria
òt : un pche ch' al né cata mìga la porta, parchè al còrra e al
fa zógh e assist par du; mo anca par lu l’é cuistjón
äd partidi, e po’ cuand al sé zblocarà al né lasarà pù lì
Meländri
séz : un po’ fóra dala partìda, am' sa ch' al faga 'na partìda
bón’na e vùnna un po’ meno, se tant am' da tant, domenica ch’
vén al dovrìss fär 'na partìda da CR7, dónca Gigi al vól fat
zugär sénsa se e sénsa ma
Baraye
déz : déz gol e déz par cme al sé 'drè disiplinär e zugär par
la scuädra; grand lavor äd Gigi còsste chi, e anca grand lavor äd
cóll ragas chi ch’ al sé convint äd där a menta al Mìsster ch’
al pól fär 'na carjéra äd tutt
rispét dabón
Corapi
déz : l’Iniesta dal Pärma, n’ ätor che in sèrja D al gh’éntra
cme al Pärma a srè cme dìr, njént !
J’ agetiv p'r i complimént j’ én fnì, certo che l’impresjón
ch' a gh' ò avù a Colècc' sòtta al dilùvvi dòpa sìnch
minud ädla prìmma partidlén’na contra la scuädra äd Max, che
còsste chi l’é un zugadór ch' a gh' n’éra di pù balord l’an'
pasè in sèrja A, l’éra còlla giùssta ! grande Ciccio !
Apolón
déz : Gigi, dòpa trèj partìdi con i mé amigh j' ò scomìss che
a Nadäl a sarìsson rivè con ot pónt äd vantàg' : j’ én béle
nóv, l’é véra che la scuädra l’é do spani suparjóra
a tutt chilj
ätri, l’é anca véra che
cuand at' si oblighè a vénsor la 'n n’é mäj acsì còmda, e
invéci col campionät chi al sèmma adrè stravénsor ! GRANDE GIGI
!
CARICA
CROCIATI
(Tgnèmmos vìsst)
(Testo di Crociato 63)
(Correzione ortografica a cura di Enrico Maletti)
Post
Nessun commento:
Posta un commento