Il Pagéli di Crozè in djalètt Pramzàn, testo pubblicato sulla "Gazzetta di Parma" del 3 maggio 2011

(Testo solo in dialetto Parmigiano)
Pärma Palèrom 3-1

Mirànt sèt : un vót p’r il do parädi in sicurèssa,e par la sfortón’na, adésa ch’ a s’éron tornè a zugär col schema pu sicùr anca tì a t’ s’ér drè a crèssor cme l’an’ pasè

Pavarén déz : un vót par tutt al lavór fat al scur,in silénsi par där ‘na man ai tò compagn, ala socetè e a tutt cuant, un ragas e un profesjonìssta séri e inteligént

Feltscher sèt : al so al so che al vót al sarìss pu bas, mo par col lì a gh’ pensarà Paolo Grossi, mi a vój premiär un giòvvon che dopa tanti paroli a gh’è volsù al cambi d’alenadór par färol zugär da l’inìssi ! Forsa e coràg’ gionvòt

Palètta séz : chi du la davanti dal Palèrom, j’andävon cme il giaronädi, dir chi sìon stè anulè sarìss ezagerè però un bél freno a gh’ l’i mìss e n’é miga pòch mo second mi la sira a t’ sarè andè a lét bonóra da la stanchèssa

Lucaréli séz : al stès giudìssi dal tò socio, ‘na granfadìga mo in fónda l’é al risultät ch’ al sarvìva, osìa fär pu gol che al Palèrom, l’important l’éra col lì

Gobbi séz : Prandéli in tribuna l’arà pensè “se Dio vól Gobbi l’é artornè a zugär al so pòst” ch’ l’éra pò indò l’al metäva lu a Firéns, n’ätor che la Colomba la gh’ à fat bén bombén

Valjàn òt : anca Valiàn l’é tornè col äd l’an’ pasè, ‘na lévra sénsa milsa e sénsa fìddogh, gran reza e poca speza, mah… sa péns a cuant méz j’ èmma butè via da setémbor fin a un méz fa…a tutt il manéri dai fa un dispét al Bològgna domenica ch’ vén dai

Morón òt : cme l’é bél ah Stefano zugär con vón äd pu in méza ? Pénsa ch’ a t’è tochè sudär al sangov p’r ot méz e con vón in meno färätor che dil figuri da cicolatén

Dzemaili òt : oh se Dio vól a t’ pòs där un bél vót, gran gol ah ? Si gran gol dabón, parchè vól dir ch’ é cambiè l’aria, ch’ a gh’ cardìv tutt dal prìmm a l’ultom e dal prìmm a l’ultomminùd, ch’ l’é col ch’ a vól i partegiànt (tifosi), miga di campión, mo ädla génta ch’ l’a suda !

Modést nóv : un vót in pu parchè col gòl lì l’é stè al spéc’ ädla mentalitè e ‘dla vója ch’ a gh’ metìv, e par ch’ la corsa infinìda ch’ a t’ gh’è, veramént impresjonanta, jerdlà in sèrt momént a te ’m paräv Benarrivo, e guärda ch’ l’é un complimént grand un bél pò vè

Giovinco sèt : ‘na plùgga ch’ a lòta cme un Benetti al sarvìssi äd la scuädra a né ‘m pól che fär piazér ! E ‘na zugäda genjäla sul second gol, pròprja geniäla, tutt somè ‘na stagjón pozitiva, miga un lusso cme dìz un cualchidón, parchè zugär a Pärma a gh’ à da ésorun lusso p’r i zugadór, mo sa té t’ si catè bén mi a né ‘m dispjazrìss miga ch’ a t’ restìs

Crespo déz : ch’ a ‘n s’ofénda nisón, mo Hernanl’é stè l’òm pu important äd la stagjón, parchè l’à fat igol important al giron d’andäda, al gh’ à mìs la facia in sèrt momént cuand l’ùnica facia credìbila ch’ a podäva mandär avanti la socetè l’éra la sòvva, l’à fat l’alenadór cuand äd fat l’alenadór al né gh’éra miga… un campjón

Candréva sèt : p’r al gol ch’ à sarè su tutt emiga p’r ätor

Colomba déz : che vót där a un Mìsster che sénsa champagne e sénsa alsär ‘na volta la vóza al gh’ à ‘na média äd 2,25 pónt a partìda? Mo prìmma äd tutt cualchidón in Socetè aràl capì ‘na volta par tùtti che la Sèria A la né miga la so Playstation ? Oh Mìsster dato ch’al gh’arà al dént vlinè col Bològgna, gh’al fämma un bél scärs a la Socetè e a Malezàn ? Che goduda ch’ la sarìss ah ? Dai su ch’as faga ch’l’ätor regäl dai !
(Pramzàn dal sas)

(Tgnèmmos vìsst)

(Testo di Crociato 63)

(Correzione ortografica a cura di Enrico Maletti)