Campionato di calcio serie B 2008-2009 prima partita casalinga del Parma allo stadio Ennio Tardini

Campjonät äd calcio serie B 2008-2009 prìmma partìda in ca’ dal Pärma al camp sportìv Ennio Tardini

(testi solo in dialetto Parmigiano)
Il Pageli di Crozè in djalètt Pramzàn.

Parma Rimini 1-1

Pavarén sìncov : l’éra ancòrra in vacansa chilù e si chi fan alenamént da ‘n méz, ‘na dormìda giganta e mäj sicur

Troest séz : da la paura äd sbaljär l’é stè in-t-i prìmm dàn, dardè discrèt, ma cme impostasjón lasämma pärdor

Castlén sìncov : Pavlén l’ha arcminsè in do l’äva fnì, intrégh, pòch precìz, inùttil cuäsi pericolóz, däros ‘na mòsa subit par piazér

Paci séz : sufcént njént’äd pù, intrégh anca lù, timoróz du pè da zgrizór insòmma da migliorär e parècc

Lucaréli (picén) séz : al m’è piazù, decìz, sénsa paura, però l’ha scambiè al Tardini p’r al zardén äd cà sòvva dato ch’ al pasäva sémpor la bala a so fradél

Morón sìncov : Stefano t’ è béle zughè al bonus no ? äd solit al zbalia ‘na partìda a l’ an’, da chi inànz a sèmma trancuìl, ch’al farà sémpor stravèddor

Budel sìncov : l’é dzèvvod cme un pjat äd la mensa äd l’ospedäl ! in méza al camp cära al me lòmo in serie B a ‘d gh’è da cmandär tì, miga ch’j ätor capì ???

Leon déz : Leon äd nom e anca äd fàt, al pu bón in camp sens’ ätor, grènta técnica concretèssa fantazìa ! s’ al contìnua acsì a’s farà divertìr dabón !

Reginäld sìncov : al fa un cuädor e po’ quand l’é drè fnìrol al gh’ é straja insìmma tut i colór! Al sòlit, a cónt fàt njét’ äd bón

Kutuzov cuator: insòmma a’s vèdda che in pianura al né ’s cata miga bén, n’andadùra imbarasànta, ‘na mìssa da trisètt o da conchén pù che zugadór! mah !

Lucaréli (grand) séz : séns’ ätor méj dispòst rispét a l’ an’ pasè, so cuant chilo in meno, sperèmma ch’al càta al gol ala zveltén’na e ch’al ne lèsa pù lì

Paloschi séz : un gol magnè incredìbil, ma cualitè impìggn e bón’ni zugädi, un gran bél colp äd marchè secónd mi ! avanti ragasén sénsa paura

Cagni séz : cuàtor atacànt j’én un po’ tròp, però in complés a’s vdda parèci còzi pozitivi, certo ch’ a gh’è d’ andär in forma subìt sionò a’s pérda di cólp béle a l’inìssi e a’n va miga bén

Pubblich déz : sens’ ätor da serie A, curva meraviljósa, e tut al resta a drè ! la serie B la podrìss sarvìr anca a nojätor a tornär coj pè par tèra, a condisjón ch’ la dura n’an’ e basta ! AVANTI CROCIATI !
(Tgnèmmos vìsst)

(Testi di Crociato 63) (Supervisione ortografica di Enrico Maletti)