AL ME SCOLÄR ENRICO MALETTI
Gh’ é chi dédica ‘na poezìa o un sonètt ala moróza
chi invéci po' al la scrìvva ala so spóza.
Mi ch’ a scrìvv dìl balosädi ispirè dal simpatìi e ànca affetti
vój dedicär sté socuànt rìghi al mé scolär Maletti.
L ‘ é ‘na parsón’na che par fortón’na j ò rincontrè
dòp cuäzi pu äd sincuànt’ àni che con do plati l’ äva batzè,
parchè, gh’ i da savér...che mi són stè al so profesór
al scóli médìi indo’ insgnär la técnica l’éra al mè lavór.
A n’ ò pasè äd ragàs, ‘na mùccia..in tànt àni d’insegnamént
mo m’arcòrd soltant..i pu simpàtich v’ al dìggh sinceramént.
M’ arcòrd vlontéra d’ un tracagnòt ciciarón ..ànca se mìga un fico
ch’ al rispondäva al nòmm m’ arcòrd .....d' un sèrt Maletti Enrico.
N’ arìss mäij pensè che Enrico in méz' a sté mucc’ äd ragàs
l' éra l’ originäl dal pramzàn dal sas.
Mi ch’ à són cmé spìrit e tradisjón un pramzàn vér
vèddrol recitär dòp cuarànt’ àni in djalètt l’ é stè un pjäzér.
" Mo ve'" al mé scolär Maletti...l’ é dvintè a Pärma ‘na sòrta äd celebritè
al raprezénta cól cór e degnamént la tradisjón ‘dla citè
Enrico l’ é cmé un bón cafè ristrètt... e alora un concentrè
e al gh’ à déntor tùtt il virtù e i caràtor ‘dla Parmigianitè.
Al gh’ à ancòrra al spìrit Pramzàn.. sia par l’ironìa che par savér torlìr,
ànca s’ al zbràja un po' da bas... v’ al giùr, al s' fà sentìr.
Pensì génti cmé l’ é la vìtta... decisamént pjén’na äd scaravoltón
adésa l’ é al profesór ch’al va da lu...p’ r al djalètt a tór lesjón.
L’ à fat ‘na còza granda p’ r i Pramzàn sia p’ r i sjòri che p’ r i povrètt
l’ à mìss insèmma un gran bél sit in djalètt insìmma a internet.
Acsì socuànt strajè o chi gh’ à äd Pärma un pò äd nostalgja
con " Pärmaindjalètt" i tórnon a ca' sòvva e i’ s mètt’n in alegrìa.
Adésa Enrico a gh' dagh’un tàj..se no t’ èt mónt la tésta
t’ si stè promòs ancòrra... su catèmmos in compagnìa e fèmma fésta.
Giorgio Capelli
Maggio 2007
Post
Nessun commento:
Posta un commento