(Testo dialetto parmigiano) La ricéta p’r i tordè d’arbètta ala Pramzàna

Ingredjént par la pàsta:
Sesént gràm äd farén’na, cuàt’r óv, socuànt cuciär d’ àcua, un psigòt äd säl.

Ingredjént p’r al pjén:

Tarzént gràm d’ arbètti, tarzént gràm äd ricòta romàna, du giäld d’ óv, séntsincuànta gràm äd formàj pramzàn razù bón.

Par consär:

Butér frèssch, formàj pramzàn bón.

Lavär bén bombén ilj arbètti, po zbojintäria con pòch' àcua, zgosäria e stricagnäria par tirär via tutt i resìddov d’ àcua e tridäria fén. Mèttor la ricòta in-t-na trén’na insèmma alj arbètti tridädi, i giäld d’óv, al säl e al formàj pramzàn razù.Tastär al pjén par vèddor s’ l’ é bén savorì mèttrol in frìgo cuatè, preparär la fojäda sutìla. Ciapär al pjén e fär di mucc’ insìmma ala fojäda a pòca distànsa vón da ch' l’ ätor, pigär la pasta e schisärla con i dìd trà un mucc’ e l’ätor, tajär i tordè con la rodéla par la fojäda. Fär bòjjor l’àcua bén saläda in-t-na bronza e pò versär i tordè in-t-la brónza. Mezdär con manéra e cuànd j én còt al dént tór via la brónza dal fógh. Con ‘na mess’cia foräda tiräria su poch ala volta e mèttoria a strät in-t-na supéra con ‘na spolvräda äd formàj pramzàn razù e ‘na coläda äd butér fuz a fógh lént ogni strät. Sarvìria bén cäld.

E.M.

Tgnèmmos vìsst