(Testo in dialetto parmigiano)
Sampdoria
Pärma 2-2
Mirànt
nóv: un vót
ala “cariera” pramzàna duräda séz an'; ragas séri, pù séri
lù che al so barbér, portér äd tutt rispét, mäj 'na
contestasjón mäj 'na parola
'd travèrs, in bòcca al lòvv Antonio, e se mäj t’artornarè a
Pärma par tì a gh' srà sémpor un ciocamént äd
man da pärta mèjja
Casàni
òt : par tì l'òmmo as' farmèmma a l’an' pasè ch'a t’é fat
un campionät strepitóz,
st’ an' lasèmma stär parchè vón
ch' a fa n’operasjón ala
schén'na e sora al cont al né ciapa gnanca un bòr da lujj, al né
pól mìga ésor giudichè
Feddal
òt : l’artórn’a dir, mo
indó guärdni i procurator par
'n avér mìga vìsst còll ragas chi fin a znär e dir ch’ al gh'
à béle vintisinch an' ! ala spararò gròsa mo chilù l’é vón
di déz pu fort centräl dal campionät
e tant par fär n’ezémpi Palètta al né gh' gruppa gnanca il
tarnètti
Lucaréli
òt : lasèmma pèrdor al camp, còll li st an' al né gh’éntra
njént, al vót l’é par còll
ch' at' si 'drè fär fóra, e
parchè t’é sémpor pensè prìmma a tutt ch’ j ätor che a ti !
spér d’arvèddrot anca st’ an' ch’ vén cme t’é dìtt in
pjàsa socuant gióron fa, in
cualùnncue pozisjón, mo par
la rinasita dal Pärma n’ OMM cme ti al sarvìssa cme l’òr !
Gobbi
òt : väla al stés discors fat p'r al Capitàn, Massimo a spér
d’arvèddrot anca ti st’ an' ch’ vén, cualùnncue la sia la
categoria, parchè anca ti in camp e sopratùtt fóra
t’é dimostrè d’ ésor n’ OMM vér, cme a s’ 'n in càta
poch in gir
Varela
déz : un grand zugadór e un
grand profesjonìssta fin in ùltom, e
cuand a t’é sgnè l’ùltom,
belìssim gol, vón cme ti che
in cariera l’à véns cuäzi tutt, t’é ezultè con la felicitè
ch' a gh' pol avér un putén, la felicitè sincera; gràsja par còll
ch' at' s’é regalè ( vìsst còll ch' l’à ciapè l’é
pròprja al cäz äd dir regalè ) in chi putrop pòch méz a Pärma,
pòch méz mo s’arcordarèmma äd ti p'r un bél pò
Lila
òt : cuand l’é rivè chi a paräva cuäzi 'na burla, invéci l’à
zughè, al s’é impgnè e l’à anca fat un belìssim gol a San
Siro ! sa' se’ gh' la cavìss a restär in B còll ragas chi al
vrìss convint a restär e second mi al né fariss gnanca 'na gran
fadiga
Mauri
déz : rivè chi un putén, al va via da campjonsén, e sémpor con
'na certèssa, Pärma e al Pärma in-t-al cór;
e nojätor a ’n podèmma che augurärot 'na carjéra strepitóza
e äd restär còll ragas sémplic' e puli ch' a té t' si dimostrè
Jorquera
séz : e insòmma anca lu al n’à mìga abandonè la bärca e l’é
stè chi fin in ùltom e chi sa mäj che in-t-na categoria inferjór
al pòsa figurär un po’ méj
Nocerino
déz : “Noce”, gràsja a tì; gràsja dal belìssim adio insìmma
a Instagram, gràsja d’avér dè tutt fin a l’ùltom second,
gràsja d’ésor stè profesjonissta ezemplär in-t-un momént
difìccil bombén par ti oltra che par la situasjón
ädla societè, anca par ti un gross in bòcca al lòvv parchè té
t' pos arpiclär completamént e at' pos continuär la carjéra ala
granda !
Palladén
zéro : purtrop l’ùltma pagéla in sèrja A am' tòcca färla a
chilù, a 'n m’intarésa njént dal gol, al zéro l’é par tutt
ch’ j an' chi, si t’ àn fis'cè par cuat'r an' prova a dmandärot
al parchè e sperèmma pròprja che còsste chi al sia n’adio e
mìga n’arväddros
Sandro
Melli déz : orgój pramzàn,
ùnnica bandéra ch' l'à s’é salväda e ch' al diz sémpor còll
ch' al pénsa in-t-al mond dal calcio fäls e coròtt dal gióron
d’incó; poch importa la
categoria, poch importa chi srà al nóv
padrón, Sandro l’é al Pärma
e al gh’arà da ésor la prìmma préda ädla nóva
Socetè, sénsa tanti bali sénsa se e sénsa ma
Donadón
déz : Mìsster gràsja äd tutt, gràsja äd du an' e méz da grand
alenadór e äd l’ùlt'm an'
da grand Sjòr; lesjón
d’educasjón e dignitè a
tutt Itàlja e la bravura a tgnir insèmma un ambiént ch’al
pardäva un tòch tutt i dì Pochi paroli cme sémpor, ansì vunna e basta : GRAZIE! AVANTI
CROCIATI
Tgnèmmos vìsst
(Testo di Crociato 63)
(Correzione ortografica a cura di Enrico Maletti)
Post
Nessun commento:
Posta un commento