Par la sìra äd San Zvàn parmaindialetto pubblica "La ricéta p’r i tordè d’arbètta" in djalètt pramzàn. Bón’na rozäda a tutt i pramzàn…

 La ricéta p’r i tordè d’arbètta

  Ingredjént par la pàsta:

Sesént gràm äd farén’na, cuàt’r ớv, socuànt cuciär d’ àcua, un psigòt äd säl.

Ingredjént p’r al pjén :

Tarzént gràm d’ arbètti, tarzént gràm äd ricòta romàna, du giäld d’ ớv, séntsincuànta gràm äd formàj gràna pramzàn razù bớn.

 

Par consär:

Butér frèssch, formàj gràna pramzàn bớn.

  Lavär bén bombén ilj arbètti, po zbojintäria con pòch àcua, zgosäria e stricagnäria par tirär via tutt i resìddov d’ àcua e tridäria fén. Mèttor la ricòta in-t-na trén’na insèmma ilj arbètti tridädi, i giäld d’ớv, al säl e al formàj gràna pramzàn. Tastär al pjén par vèddor s’ l’ é bén savorì mèttrol in frìgo cuatè, preparär la fojäda sutìla. Ciapär al pjén e fär di mucc’ insìmma a la fojäda a pòca distànsa vớn da l’ ätor, pigär la pasta e schisärla  con i dìd trà un mucc’ e l’ätor, tajär i tordè con la rodéla par la fojäda. Fär bòjjor l’àcua bén saläda in-t-na brớnza e po strabucär i tordè in-t-la brớnza.

Mezdär con manéra e cuànd jén còt al dént tớr via la brớnza dal fớgh. Con ‘na mess’cia foräda tiräria su poch ala volta e mèttoria a strät in-t-na supéra con ‘na spolvräda äd formàj gràna  pramzàn

e ‘na coläda äd butér fuz a fớgh lént ogni strät, sarvìria béj cäld.

Enrico Maletti

Bón’na rozäda a tutt i pramzàn… 

Tgnèmmos vìsst