"Il Pagéli di Crozè in djalètt Pramzàn". Milan - Pärma 2-1. Testo pubblicato sulla Gazzetta di Parma del 17 febbraio 2013.

(Testo in dialetto parmigiano)

Milan Pärma 2-1

Pavarén séz : al vót cme d’ogni tant a fagh cój portér l’é par la majètta, fòrsi la pu béla äd tutt al campionät ! Par la partìda lasèmma pèrdor, anca se su la punisjón äd Balotéli a t’ paräv un bradipo cuand al sälta da ‘na pjanta a ch’ l’ätra !

Rosi séz : n’ätor ädla banda dil grèssti però la va bén parchè anca in camp la grèssta a né t’ l’é mäj zbasäda e a m’ pär ch’ a t’ si adrè  crèssor fizicamént, bón sìggn p’r al finäl ch’ a gh’ n’é bizòggn bombén

Palètta déz : dai déz äd fiducia e d’incoragiamént, sfortón’na e un cuälch erór pròprja la sìra ch’a gh’ sarìss stè da festegiär al complean ! Dai corag’ ch’ a t’ gh’é la ghìggna äd vón ch’al né s’ bùtta mìga zò par ‘na sira storta, tén dur

Còvva séz : béla partìda pilolón, cój pè e anca cól màn, insòmma con tutt còll ch’ a sarvìssa specialmént contra di montè e di arogànt, mäj un pas indrè e färos sintìr in-t-il gròssti

Mesbah sìncov : sinceramént l’à tochè tri o cuator balón in tùtta la partìda e a n’   n’à mìga fata vùnna giùssta che vùnna ! E pò al gh’ à ‘na mìssa cól braghètti ch’al pär bagonghi, pròprja zgrasjè al sént par sént

Valdes sìncov : Calimero njénta, a né gh’ sèmma mìga, pu che un regìssta st’ an’ a t’ pär gnanca al técnich dil lùzi, märcia ridòtta e idejj confuzi, insòmma p’r adésa un gran pisstamént äd pòcci e stop

Paról cuàtor : l’é anca véra che se Amauri a t’ läsa la bala a sarìsson adrè  scrìvvor n’ätra pagéla e a parlär äd n’ätor risultät, mo a pärta ch’ l’inserimént li zéro sòtta zéro, invizìbbil cme domenica indrè ! Zvélja lòmmo parchè acsì a né gh’ sèmma mìga.

Marchionni sìncov : Marchino sté gir a té m’ si mìga piazù ; gnanca ‘na zugäda da Marchino e in compéns trop trop narvóz ! Dai vè ch’ a t’ si mìga important in ch’ la scuädra chi, a t’ si fondamentäl

Biabiany séz : ala fén il do còzi pu importanti j’én gnudi da tì, però ancòrra trop trop poch, a pär n’asurditè mo  a t’ si trop lént, mìga äd gambi, äd tésta, e dato ch’ l’é còlla ch’ a cmanda il gambi a n’é mìga un gran bél lavor

 Amauri séz : zbatù in méza a fär bùjja con Yepez e Zapata, ossìa du ch’ a zbrussc’ia mìga da riddòr, a t’ é mäj fat un pas indrè ! Purtrop a t’ fè fadiga catär al gol da un pò trop témp, mo p’r al rést njént da dir, sémpor al masim impìggn e la maja sudäda ala fén d’ogni partìda

Sansón òt : purtrop al gol l’é rivè trop tärdi, mo anca prìmma al pu viv äd tutt, al pu zvèlt e còll ch’ a da l’idea äd podér fär mäl da un momént a ch’ l’ätor e al bél l’é ch’ al né da mìga l’idea e basta, chilù al fa bén dabón, con ‘na regolaritè impresionanta ! Un gran zugadór sénsa ombra äd dùbbi

Donadón séz : Mìsster stavolta njént da dir, scuädra imbrocäda, sfortón’na e al colp d’un fuoricläsa i s’àn batù mo p’r al rést a s’é zughè ala päri e a n’ s’é mäj molè ! Dónca però adésa l’é ora äd cambjär märcia e regìsstor e tacär a vénsor parchè…. parchè il scuädri i saràn pu ala nostra portäda e il gambi i m’àn dè l’idea äd tacär a girär méj ! AVANTI CROCIATI

(Testo di Crociato 63)

(Correzione ortografica a cura di Enrico Maletti)