Pédor Vignäli al scrìvva ancòrra e al tàca Elvio Ubäldi

(LETTERA DI PIETRO VIGNALI IN DIALETTO PARMIGIANO)

Pédor Vignäli al scrìvva ancòrra, e al tàca Ubäldi: "Pu che un ritóron, sarìss stè méj un ritìr"

L’ex sìnndich Pédor Vignäli  al tóz cärta e pènna, e al scrìvva par diféndor i cont dal Cmón e dil socetè  partecipädi. E par tacär Ubäldi, che par Vignäli l’é stè  l’artéfic’ dal trapìcch in-t-al  bilanc’ äd l’ént.

LA LÌTTRA ÀD VIGNÄLI

"I cont dal Cmón e dil socetè partecipädi dal Cmón äd Pärma j én in sicurèssa, cme uficializè da Ciclosi in chì gióron chì. Mi péns che al Comisäri l’ àbja lavorè bén bombén, al gh’ à mìs al màsim äd l’ impìggn in còll so incàrich chì in-t-la nostra citè. Par còsste al vój ringrasjär. A so bén bombén  có vól dir “fär al sìnndich” e cuant sacrifìssi a gh’ sia da fär. Par còll ch’ riguärda la spéza corénta, a dir al ver, i cont  a j ävon béle mìs apost  nojätor, sénsa avmentär il tasi: al Bilanc’ lasè da Ubäldi in-t-al 2006 al s’éra sarè su  con un trapìch negatìv d’ 8 miljón d’èvro ch’ j  éron cuatè su  da plus valor e oblìgh d’ urbanizasjón; durànt al mè mandè aministratìv j ò cuäzi azerè ch’ l’ utilìz impròpri chì dilj enträdi straordinäri second i prinsìppi ädla coréta contabilitè pùblica. Sul front  äd l’indebitamént, al Comisäri l’à operè con razón. L’é lampant, però, che se la situasjón la fùssa städa acsì  disgrasjäda cme sartón i la descrivävon  in manéra da apocalìss, par cuant bräva al sia Ciclosi, nisón  in tri méz l’arìss podù  giustär un Bilanc’ al colàs. Perciò  täl evidentemént al n’éra mìga. Mo mìga par còsst a ‘n vój mìga lasär indrè i probléma: l’indebitamént dìl socetè partecipädi  l’éra e al résta ält bombén .In-t-ilj ùltmi stmàn  chì, j ò vìsst con pjazér un pas in avanti ädla polìttica locäla  in-t-la  diresjón ädla vritè di fat: incó i partì dal centorsinìsstra sénsa risparmjärom njénta, par caritè, e in socuànt cäz con crìttichi fondädi, i dìzon  che pu dal 90% äd l’ndebitamént  (Stu Stasjón, Stu Pasùbbi, Spip) l’é stè determinè da sèlti  fati da l’Aministrasjón Ubäldi. Al n’è mìga al zógh dal scàrga-barìll, parché mì il mè responsabilità  a mì a tógh tùtti pienamént, mo di àt pùbblich e còzi céri dovùdi ai citadén. Incó podèmma dìrol, anca purtròp cóntra  vlontè  dòpa avér fat  pärta: äd socuànt decizjón äd l’ùlltma aministrasjón Ubäldi,  j àn prodòtt di dàn gros bombén ala citè. Prìmma mi e pò al Comisäri Ciclosi  a s’ s’èmma catè in-t-la mìga fàcil situasjón äd dovérja gestìr e corézor. Ubäldi al pärla äd “ritór’n al futùr”. Pu che un ritóron,  mi a m’ sarìss aspetè un ritir. Sarìss stè méj par tutt.

Pédor  Vignäli